P&E Veng-a Leisekawt Mual laihzauh hna thawh chhunzawm a ni tawh dawn lo

Serchhip P&E Veng-a Leisekawt Mual laihzauh hna thawh chu chhunzawm a ni tawh dawn lo a, tuna laihzauh chin pawh RD Department chuan ram hauhna atan a hung siam turin ruahmanna an siam bawk.
Serchhip P&E Veng-a Leisekawt Mual laihzauh hna thawh leh he Mual laihzauhna tura RD Department Staff Quarters tihchhiat tak te awmna tur sak dan tur hi nimin khan RD Minister, Lalruatkima chuan a hmunah tlawhin a enfiah a, Leisekawt Mual laihzauhna hna thawh mek leh he Mual laihzauhna leivung paihna, Mual sir ami te a en hnuah RD Minister chuan tuna Mual laihzauh hna thawh chin bak chu laih a nih tawh dawnloh thu sawiin, a chhak lama Serchhip BDO Quarters lam ko sang ta lutuk pawh a min mai hlauhthawnawm a nih avangin a dawlna siam turin hmalak nise, a theih angin Chief Minister hnenah pawh thlena hmalak a tul tur thu a sawi a, ICDS Office hnaih lama leivung la paihfai loha awm te chu paihfai dan ngaihtuah tul a tih thu pawh sawiin, hemi paihfai a nih rual hian Retaining Wall hi siam tura hmalak nghal a tul dawn thu leh sum pawh a theih anga ngaihtuah tur a nih thu a sawi a. Tuna Mual laihzauhna, RD Department ram chu Serchhip in KTP General Conference a thlen zawh veleh ram hauhna atan a hungna siam nghal a nih dawn thu pawh sawiin, tuna kawng awmsa chin zelah Side Drain tha tak siamin hemi hrul ah hian a hungna hi siam a nih tur thu a sawi a, he an ram hung tur hi a tul anga Vantlang in an hman theih thin tur thu a sawi bawk.
He Mual laihzauh hna thawh a nih dawn avanga RD Department hnuaia BDO Staff Quarters thiah tak panga (5) te thlakna tura Quarters sak dan tur pawh RD Minister hian en nghalin, heng Quarters te thlakna atan hian Serchhip P&E Veng-a DRDA Office hnaih ah Staff Quarters hi sak tura ruahman a ni a, heng Staff Quarters sak dan tura ruahmanna an neih te Serchhip DRDA Project Director, H. Dolianbuaia leh Serchhip BDO, Vanlalhmachhuana te chuan lo kawhhmuhin Department Engineer te nen hmalak dan tur an sawiho a, tuna ruahman dan chuan BDO Staff Quarters hi DRDA Office hnunglam, P&E Lane hnuai lamah sak tum a ni a, ruahmanna kimchang siam leh tur a ni ang.
Nimin a Serchhip rawn tlawhtu RD Minister hi East Tuipui bialtu MLA, H. Ramthanmawia chuan rawn tawiawmin Serchhip DRDA Project Director, H. Dolianbuaia leh Serchhip BDO, Vanlalhmachhuana bakah Serchhip DIPRO, K. Saitluanga te chuan an lo dawngsawng a ni.

Comments

Chhiar Hlawhte