Halpuah leh halmawi khapna hi

Mizoram sawrkar chuan hunpui kan hmanliam takah khan Halpuah leh halmawi lam chi khapna thupek a chhuah a, hetiang bawk hian kumdang ah te pawh khapna hi chhuahin a chang chuan YMA Branch ten inelna atan te hmangin hlawhtling taka kan lo khap tawh tum te pawh sawi tur a awm ang.

Amaherawh chu tun tuma Hunpui kan hman liam takah khan heng Halpuah leh halmawi khapna erawh a hlawhtling lo hle niin a lang a, hei vang hian sawrkar thuneitute tan pawh hetianga khapna thupek chhuah si a hlawhtling lo hi a chhan chhuichhuah ngei a pawimawh hle mai a. Kumdang lo awm zel tur atana zirchianna atan hmang thei ila a duhawm hle a ni.

Halpuah leh halmawi chi hrang hrang te hi sum leh pai senralna a nih mai bakah kan boruak tichhetu leh hriselna atana tha lo, mi tam tak tana harsatna thlentu a nih thu hi kan sawi fo thin a, hei vang hian mi tam tak te pawhin sawrkar thupek zawmin an hal loh phahin, a zuar thin te pawhin an zawrh loh phah thin a. Amaherawh chu hetiang a nih lai hian tun tumah erawh ualau taka lo hal hi an tam hle niin a lang a, thupek bawhchhia a man erawh sawi tur an tamlo hle thung si hian hetiang khapna kan siamna chungchang ah pawh ngaihtuahna a siam tam hle ang.

Hetiang halpuah leh halmawi lam chi te hi kan sawrkar thuneitute hian a thalo tia hal lo tur leh hmang lo tura mipuite min duh a nih chuan khapna thupek hi tun aia nasa zawka bawhzui ni thei se a duhawm hle mai a. Chutiang ni lova kan lo tih tawh thin ang a nih vang maia hetiang thupek hi tichhuak kan nih phei chuan kumdang ah chuan khap tawhloh hial zawk hi a tha in a rinawm.