Traffic Police ten Dan bawhchhia mi 90 man

Kum kalta (2019) December thla chhung khan Serchhip Traffic Police te chuan dan lo anga lirthei khalh 90 manin, heng mite pawisa an chawitir tlingkhawm zawng zawng hi Rs. 33,600/- a tling.

Nikum December thla chhunga Serchhip Traffic Police ten lirthei khalhtu Dan bawhchhia an man zingah hian lirthei ke pahnih nei (2 Wheeler) tam berin 52 man an ni a, heng mite pawisa chawi tlingkhawm hi Rs 17,000/- niin Three Wheeler (Auto Rickshaw) 18 man an ni bawk a, anni atanga pawisa chawitir zat tlingkhawm hi Rs. 8,000/- a ni a, Lirthei te chi (LMV) 13 man niin pawisa chawi tlingkhawm hi Rs. 6400/- a ni a, Truck 7 man ni bawkin heng mite pawisa chawi zat hi Rs. 2100/- a ni.

Serchhip Traffic Police ten heng dan bawhchhia an man zinga tam ber chu License neilo leh fello a motor khalh niin license neilo leh fello hi mi 47 zet man an ni a, Two Wheeler-a mi pahnih aia tam chuang leh Helmet khum lova Two Wheeler khalh 23 manin motor dah phallohna hmuna dah 16 leh Insurance fello-a khalh lirthei 3 man a ni bawk a, zurui chunga motor khalh 1 man a ni bawk. Serchhip-ah hian Traffic Police te hi Asst. Sub-Inspector kaih-hruaina hnuaiah awmin ASI 1, Head Constable pakhat leh Constable mi 4 an awm mek a ni.