Nitin hmeichhe mangang 10-in Helpline an bia, Mipa kut an tawrh chhan ber ‘zu’ a ni

Universal Women Helpline Mizoram chuan July 2016 atanga November 2019 inkar chhung khan betu mi 4705 a nei a, chawhrualin nitin 10 betu nei ang an ni a. Hmeichhe zinga kut inthlakna thlentu tam ber chu Zu a ni.

Universal Women Helpline enkawltute sawi danin anmahni betu 4705 an neih zinga 2663 hi harsatna tawk hmeichhia ten an biak a ni a, a dang 2042 hi an chhung leh thian hnai ten an biaksak a ni a. UWH chuan harsatna avanga anmahni pantu zingah hian case 849 siamin heng zinga a zatve aia tam case 575 hi Aizawl khawpui chhunga cheng an ni a, a dang 274 hi Aizawl pawn an ni thung a. Case an neih zingah hian pasal nei lai te chu a tuar tam ber an ni a, inthen hnua harsatna tawk thahnem tak an awm bawk a. Harsatna tawk hmeichhe zingah kum 21-40 inkar an tam lawrlak bawk a ni.

Hmeichhe tihduhdah/kut tuar zingah pasalte kut tuar an tam lawr lak a, bialpa te kut tuar in an dawt a. Hmeichhe kut tawrh chhan tam ber hi an kawppui ten zu an in/ruih vang a ni a, damdawi ruih vanga kut inthlak pawh engemaw zat a awm bawk a. Mipa tam zawk chu an harhfim laia fel tak, mahse zu/ ruihhlo an tih hnua an kawppui te kutthlak thin mi engemaw zat an awm a ni.

Zawhna chhangin Universal Women Helpline thawktute chuan Mizoram chu a mipui cheng ngaihtuahin hmeichhe chunga hleilenna chi hrang hrang thlen tamna hmun a ni a. Tuna case an neih bakah hian in report lova in ngaidam leh tuar ta mai mai pawh mi thahnem tak an awm nia an hriat thu an sawi a. UWH thawktute chuan darkar 24 chhung duty an nih avangin an case neih chu a rang thei ang bera ngaihtuahin dah that (pending) an nei lo tih an sawi a, a tulna hmun Police, Court-ah te an thlen zung zung thin niin an sawi a. Hmeichhe tanpui ngai te chu a tul dan a zirin One Stop Centre, Durtlang-ah dahin a baihvai zual te chu an dinhmuna zirin Swadhar Greh (Hmeichhe tanpui ngai te awmna) Kelsih leh Mualmam-ah te dahin puanthui, vawk vulh leh thiam thil chi hrang hrang an zirtir thin niin an sawi bawk. 

Hmeichhe tihduhdah tuartu zinga a tam ber chu lehkha thiamlo leh eizawnna kawngah pawh khawsak hnuaihnung zawk te an ni tih pawh sawiin, dinhmun sang chelh zingah pawh harsatna tawk an awm nual niin an sawi a. Hmeichhe chunga an chetna avanga Jail tang pawh engemaw zat an awm niin an sawi bawk.