Directorate of Health Services lirthei lei dan Assembly PAC in an ngai thutak hle

Assembly Public Accounts Committee (PAC) chuan Mizoram sawrkar-a Health Department-in sawrkar sum hman dan tur duan kalha lirthei cheng vbc. 3 man a lei chu a ngai thutak hle a. Lirthei leina tura sum pek tawh thenkhat phei chu tun thleng hian lirthei an la dawnglo bawk a ni.

Finance Commission 13-na in Mizoram sawrkar chawhphurna (incenive) atana cheng vbc. thum a pek, Hlamzuih-a thihna titlem tura hmalaknaa hman tur lirthei leina tur atanga Directorate of Health Services (DHS)-in lirthei an lei dan chu CAG-in tha a ti lo hle a, hemi chungchang hi PAC chuan bawhzuiin lirthei lei tura ruahmante chu Mana Motors atangin Bolero 26 (Rs. 189,87,000/-), HB Motors atangin Gypsy awmkhauh chi 7 (Rs. 55,13,000/- man) leh Pachhunga & Sons atangin Truck 2 leh Truck te chi 3 (Rs. 27,63,000/- leh Rs. 27,37,000/- man) te a ni a. A vaiin lirthei 38 leina atan hian cheng vaibelchhe thum chiah ruahman a ni a. Lirthei zuartute'n lirthei an hlan hma hawtin pawisa hi an pe tla nghal vek a. Pachhunga & Sons hian tun thlengin Truck 2 leh Truck te chi 2 hi Department an la hlan lo nghe nghe a. CAG report-in a sawi dan chuan lirthei lei tura an tih hnu hian kum 2014 khan a man hi an pe lawk vek a, a man zat tur hi dan anga phalna lak a ni lo. Mana Motors hian an lirthei pek tur (Bolero 26) hi a man tur sum an dawn atanga thla khat chhungin an pe nghal a. HB Motors chuan Gypsy 7 hi DHS-ah hian thla ruk hnu (February, 2015) khan an pe a, mahse, a awmkhauh chi ni lovin a awmnem chi (Soft Top) 6 leh Hard Top 1 an pe a ni.

Pachhunga & Sons phei chuan sum harsat chhuanlamin cheng nuai 55 man Truck leh Truck te chi hi DHS hnenah an la pe ta lo hrim hrim a. Sawrkar lam chuan HB Motors-in Hard Top aia Soft Top an dawn hnua a man inthlauhna hi an thing let leh tawh niin an sawi na a, an sum hmuh let zat hi an tarlang lo a. Hei bakah hian he sum pek a nih chhan chu hlamzuih tihtlemna tura hmalakna atana ruahman nia an sawi laiin Hlamzuih tamna hmun kilkhawra Primary Health Centre (PHC) leh Community Health Centre (CHC) lamah lirthei hi thawn ta mang lovin, lirthei 33, Bolero 26 leh Gypsy 7 zinga 18 (Bolero 12 leh Gypsy 6) chauh chu District hrang hranga Medical Officer-te kuta dah a ni a. A dang zawng lirthei 15 chu Directorate leh Zoram Medical College bakah, District khawpuia CMO-te pek an ni.

Directorate of Health Services hotute chuan lirthei hmel an hmuh hma hauhva a vaia pawisa an pek lawkna chhan hi Mizoram-ah lirthei zuartu Company duhthlan tur an tlem vang niin chhuanlam an siam a. HB Motors-in Hard Top aia Soft Top an pek avang hian a man inthlauhna, Rs. 3,56,758/- chu lalet leh tawhin lirthei lam kaihhnawiha hman tura dah niin an sawi a. Audit in an endik lai hi chuan an inpekletna lehkha an hmu zo lo niin an sawi a ni. Hei bakah hian Pachhunga & Sons hi an lirthei lei sak tura man pek vek tawh, an la thlen loh avang hian vawi 11 zet lehkha an pe tawh a, a hnuhnung ber chu nikum July ni 17 kha niin an sawi a. Sawrkar chu Court lamah kal mai se tiin an thlen tawh bawk niin an sawi.

Hemi chungchangah hian PAC chuan lirthei zuartu sum dinhmun that leh chhiat chian hmasa lo leh ziaka inremna siam miah lova lirthei lei tur leh lei hma hauh a a man tur pawisa an pe kim biai nghal mai hi a mak an tih thu leh an lungawi loh thu report-ah ziahlan a ni a. Kum 5 ral hnu pawha Truck 4 lai mai DHS hnena pek la ni lo hian diklo taka hlawkna inpek a awm a nih rinhlelhna a siam a ni, a ti a. Ziaka inremna awm lo leh a huna inpek theih lohva a pung awm tur ang pawh engmah sawi awm lova cheng nuai tel tak tak, a hmaa lo pek lawk hi sawrkar sum chetvel dan tur dan siam kalh a ni, a ti a. Chuvangin Truck pali hi la thuai tur emaw, pawisa an lo pek lawk tawh lalet thuai turin Department hnenah PAC chuan rawtna a siam a ni.