Private damdawi In 16 ten sawrkar rate pawm tawh

Mizoram sawrkar thuchhuah anga Mizoram State Health Care Scheme (MSHCS)-a sawrkar pawmpui rate zawm thei damdawi In chu tun dinhmunah Private damdawi In 16 a awm mek.

October ni 1, 2019 atanga hman Mizoram State Health Care Scheme, 2019 leh AB-PMJAY nena kalkawp tir anih chungchang ah sawrkar pawmpui rate chu Private damdawi In thenkhatin an kalpui thei lo a, Mizoram sawrkar leh Mizoram State Health Care Society ngenna anga Mizorama Private damdawi In thenkhat sawrkar pawmpui rate zawm theilo te chu October 31, 2019-a Mizoram State Health Care Society Governing Body Meeting chuan empanelled list atangin an suspend rih a.

Hetihlai hian Private damdawi In 13 te chuan damlo te inenkawlna senso bill theihna sawrkar duan ang hi an pawm thung a, thla hmasa, December ni 18, 2019-a sawrkar thuchhuah tarlan danin, Private damdawi In pathum; Maraland Gospel Centenary Hospital, Siaha, Mercy Hospital, Serchhip leh DM Hospital, Champhai te chuan Sawrkar rate siam hi pawmin an zawm ve leh a, heti hian a hma a damdawi In 13 te nen a vaiin damdawi In 16 in sawrkar siam rate hi an zawm mek a, chung damdawi In te chu; Nazareth Chaltlang, Aizawl; Eye Care Centre, Aizawl; JC Eye Clinic, Aizawl; BN Hospital, Aizawl; Alpha Hospital, Aizawl; Bethesda Hospital, Aizawl; Med-Aim Adventist Hospital, Champhai; Nazareth Nursing Home, Kolasib; Christian Hospital Lawngtlai; LCMC Lawngtlai; Hope Hospital Lunglei; Christian Hospital Serkawn, Lunglei leh Faith Hospital, Lunglei te an ni a. Heng Hospital-ah te hian sawrkar hnathawk MR leh Mizoram State Health Care Scheme a hman theih tawh dawn bakah AB-PMJAY Golden Card pawh a hman theih tawh dawn a ni.