MSU in MZU Southern Campus din tur leh Tuikuk chungchanga inremna lawmna an buatsaih

Mizo Students’ Union (MSU) General Hqrs. chuan hun rei tak chhung hma an lo lak tawhna, Mizoram University Southern Campus, Lunglei hmuna din a ni tur leh Tuikuk-te Tripura-a an awm nghehna tura inremna siam a ni ta lawmna chu nimin khan buatsaihin Chief Minister, Zoramthanga chuan a hmanpui a ni.

Aizawl Chanmari YMA Hall-a heng thil pahnih lawmna hun an buatsaih ah hian Chief Minister, Zoramthanga chuan Sawrkarin zirna ngai pawimawhin, ram hmasawn chho zelah zirna pawhin hma sawn ve zelin, zirna In sang mamawh belhna a len tak hle thu a sawi a. Mizoram University Southern Campus Lunglei a neih phalna sawrkar laipuiin a rawn pe ta chu a lawmawm hle a ni, a ti. |halai ten Nationalism awmze dik tak an hriat a tul thu sawiin, “Vai huat ringawt hi hnam hmangaihna a ni lo a, ram leh hnam tana chhawrtlak ni tura kan thiltih apianga theihtawp kan chhuah hi hnam hmangaihna kawng khat a ni,” tiin Mizo hnam humhalh a, siamtu in a siam anga hmantlak a chawikan hi Nationalism in a tum ber pakhat a ni, a ti a. Ramdang ten Mizoram min hriatna pawimawh tak remna kan neih chu chhawmnung zel turin kalkhawmte a chah bawk.

He hunah hian MSU President, Vanlalliana chuan MSU in thangkhatlian zet an lo buaipui tawh, MZU Southern Campus, Lunglei hmuna din a nih theih nan leh Tuikuk te Tripura-a an awm ngheh theih nana inremna siam kawnga hma lo la tawhtu MSU hruaitu hluite leh Mizoram sawrkar chungah an lawm hle tih a sawi a. Khual Zahawm nia he hun hmanpuitu Higher & Technical Education Minister, Dr. R. Lalthangliana pawhin MZU Southern Campus, Lunglei hmuna dinna tura order siam a ni chu lawmawm a tih thu sawiin, Mizo-ram sawrkarin kumin chhunga hawn a nih theih nana hmalak an tum thu a sawi bawk. Hei bakah hian Minister chuan Mizo thalai leh zirlaite chu kum zabi 21-na chu chona hmachhawn ngam te dinchhuahna hun a nih tawh thu leh chona hrang hrangte hmachhawn thei tura chhawrtlak leh hmantlak ni turin a fuih bawk. Nimin a he hun hmanna ah hian MSU hian Chief Minister leh H&TE Minister hi chawi-mawina an hlan nghal bawk a ni.