Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

I&PR Minister in Art and Photo Festival a hawng

Information & Public Relation Department buatsaih, Mizoram Art and Photo Festival chu nimin khan Aijal Club Park-ah I&PR Minister, Lalruatkima chuan a hawng.
Information & Public Relation Department buatsaih, Mizoram Art and Photo Festival chu nimin khan Aijal Club Park-ah I&PR Minister, Lalruatkima chuan a hawng. Mizoram Art and Photo Festival hawnna hunah hian I&PR Minister chuan lemziak lama tui mite, thlalak lama tui mite talent tarlanga mipui hnena hmuh tir tura phochhuahna hun remchang buatsaih a ni chu lawmawm a tih thu sawiin, Khawvel changkang zelah ram leilung leh hmunhma a inthlak danglam nasa a, thil thleng tawh te leh thleng mek te vawnthat nan thlalak leh lemziak a pawimawh thu a sawi bawk. Information Minister chuan I&PR Department kaltlangin sawrkar chuan chanchinbumite, lemziak thiam te, thla la thin te, film lama tui mite nena thawhhona tha tak a nei chho zel tih pawh sawiin, Sawrkar hmalaknaa Press Tour buatsaih te, Art Exhibition hrang hrang neih thin te, Film Festival te sawi langin, Lianchhiari Run sak mekah Art lama talent nei tha tak tak te tan inphochhuahna tur Exhibition Hall, Theatre leh Gallery te dah tum a nih thu a sawi bawk.
He hun hi I&PR Director, Lallianpuii pawhin hmanpuiin Art chu khawvela tawng (language) mawi ber a nih thu sawiin, lemziak, thlalak, milem ker leh tuk (sculpture) mawi tak tak te hian a hmutute thinlung ah thu tam tak a sawi thin thu a sawi a. Mizoram mawina, pi pu sulhnu leh Mizo nunzia pholang thei turte uar a tul thu a sawi bawk.
Ni hnih awh tur he Festival-ah hian lemziak thiam mi 52 telin Pencil/Charcoal hmanga lemziak 15, Water Colour 14, Acrylic Oil on Canvas 44, a vaiin 73 an tarchhuak a, Sculpture 6 an hung bawk a. Thlalak hi mi 28 te kutchhuak 165 zet pholan a ni bawk. Mizoram Art and Photo Festival hi a duh apiang tana tlawh theih niin thlalak leh lemziak te hi a duh tan lei theih a ni bawk.

Comments

Popular News (Last 30 Days)