NGO Coordination Committee in hmalak zui tum

Mizoram-a NGO Coordination Committee chuan Mizoram atanga Tripura-a Tuikuk tlanchhia te Tripura-ah an awm ngheh dawn tak avangin Mizoram Electoral Roll atanga a rang lama paih an nih theih nan hmalak zui zel nise tha an tih thu an sawi.

Nimin a thuchhuah an siamah NGO Coordination Committee chuan kum 22 chuang zet Mizo mipui ten Tuikuk chungchanga thahnemngai tak leh dawhthei taka hmalakna chuan rah tha a lo chhuah ta chu lawmawm an tih thu sawiin, Tripura Transit Camp-a Tuikuk awmte, tum 9 lai Ministry of Home Affairs, Govt. of India leh Mizoram sawrkar-in hruai haw a tum pawha lo haw duh hauh lo te, lawm taka Mizo mipui ten tum tam tak dawnsawn kan tum lai pawh a lo kir duhlo te January 16, 2020 (Ningani)-a Union Home Minister hova inremna ziah anga Tripura a awm hlen tura tih an lo ni ta chu lawmawm an ti hle tih an tarlang a. Tripura-a Tuikuk te an awm ngheh dawn tak avang hian Mizoram Electoral Roll atanga a rang lama paih an nih theih nan hmalak zui zel nise tha an tih thu tarlangin, he inremna siam hi bawhzui a nih danah NGO Coordination Committee chuan ngun takin a enzui zui zel dawn tih an tarlang bawk.