MNF sawrkar in ACB kut a phuar em ni? - MPYCC

Congress |halai, Mizoram Pradesh Youth Congress Committee (MPYCC) chuan ‘MNF sawrkar in ACB ku a phuar em ni?’ tia zawtin, Police te chu hnu chhui thei tak tak tura chhuah zalen tura sawrkar an phut thu an sawi.

Inrinni-a thuchhuah an siamah MPYCC chuan Mizoram sawrkar-a Principal Consultant, Civil Aviation Wing, J. Lalhmingliana chungchangah April 26, 2019 khan Mizoram Chief Minister leh Mizoram Lokayukta-ah Complain an thehluh thu tarlangin, J. Lalhmingliana hian April 9, 2019 khan Helicopter hire-na leh Consultancy Firm pakhat atanga a lak belhkhawm Rs.56,42,720 leh April 10, 2019-a Consultancy firm atanga pawisa a lak Rs. 45,35,300 leh C. Ngunlianchunga,MLA helicopter charter-na Rs.120,000, Cheque No. 435734 te chu ama mimal Account, ICICI Bank Account-ah a dahluh thu leh ama mimal Account-a a dahluh zawng zawng hi Rs.10,298,020 lai a tlin thu an tarlang a. Helicopter hire-na man hi Helicopter Company, Pawan Hans-ah pek tur niin Consultancy firm pawisa pawh hi hnathawh an zawh chiah loh pawhin Civil Aviation Wing-in an kawl tur leh, an zawhfel hunah pek mai tur nia hriat niin hetianga ama mimal Account-a Sawrkar pawisa tam tham tak a dah hi thil serious tak, Financial Rules kalh tlat anih bakah Corruption dik tak a ni, an ti a.

Hei vang hian J. Lalhmingliana, Principal Consultant hi a rang thei anga chhui a, Corruption Case siam sak nghal tur leh a hna atanga ban nghal turin Congress |halai Hqrs. chuan lehkha, Chief Minister Office leh Mizoram Lokayukta-ah an thehlut tih he an thuchhuah ah hian tarlangin, Chief Minister hnena lehkha thehluhin thawm engmah a neih loh laiin, Mizoram Lokayukta hnena lehkha lut erawh chuan awmzia neiin, chhui zui tlakah ngaiin, Mizoram Lokayukta chuan Mizoram Lokayukta Act, 2014 Section 19(1) tlawhchhanin, ACB hnenah thla khat chhunga preliminary enquiry ti a, Mizoram Lokayukta-ah report thehlut thuai turin a hriattir tih an tarlang.

Hei bakah hian MPYCC thuchhuah chuan Lehkha an thehluh atanga thla 8 ral hnuah pawh thawm awm lova a la reh vung vung chu an ngaih a tha tawhlo hle tih pawh tarlangin, MNF Sawrkar term hmasaa Police kut phuar tlat kha an la phelh fel lo a, thil dik lo chhui tura din, ACB te kut pawh an la phuar tlat a nih chu an rindan a nih thu pawh an tarlang a, term hmasaa Police kut an phuar tlat te pawh phel zal a, dik leh huai taka hnathawk tura thutiam la, Police te chu hnuchhui tak tak thei tura chhuah zalen a, a rang thei ang bera he thil hi chingfel vat turin sawrkar chu an phut thu Congress |halaite chuan an thuchhuah ah chuan an tarlang a ni.