Hindu lal ram din tumna thlawptu MNF hnawl a ngai - MPCC

Mizoram Pradesh Congress Committee (MPCC) chuan BJP-in Hindu lal ram din an tumna thil MNF party in a thlawp nia sawiin, hei vang hian kan hmaa Village Council leh Municipal Council inthlanna kan hmachhawn turah MNF Party chu Mizo mipuiin kan hnawla kan paihthlak ngei ngei a ngai niin an sawi.

Hemi chungchanga thuchhuah an siamah MPCC Media Department chuan BJP kaihhruai India sawrkar laipui chuan Mizo mipuite leh North East mipuiten nasa taka kan dodal, Citizenship (Amendment) Act, 2020 chu January 10, 2020 (Zirtawpni) khan Gazette-ah chhuahin dan angin a hmang tan ta tih sawiin, he hi pawi an tih thu leh hei hian Mizote leh North East mipuite BJP-in min zah loh zia chiang takin a nemnghet ni a an ngaih thu an tarlang a. CAB/CAA chu sakhaw tih bik nei a khua leh tui nih theihna tur, India constitution duangtute rilru nena inmil lo, Secularism kalh tlat nia sawiin, “Congress party chuan theihtawpin a dodal a. A kalphung leh a thil tum a that loh miau avangin Mizoram a huam emaw, huam lo emaw Kristian-te tan engti kawng maha thlawp chi-ah kan ngai lo,” an ti.

Hetiang a BJP-in Hindu lal ram din an tumna thil MNF party-in thlawp a, theihtawp an chhuahpui ta mai chu Mizoram chanchin-ah leh political history-a thil la awm ngai lo a nih thu MPCC thuchhuah chuan tarlangin, “Mizoram a CAA dodaltu apiang MNF hmelma-a an ngai ringawt mai leh, CAA dodaltu mimal leh zirlai pawl te, thalai intelkhawmte thlenga MNF-in nasa taka an beilet duh zel maite hi a makin hnam leh sakhaw pawi sawina dik tak, ngaihdam theih loh a ni,” an ti a. Hetiang a nih chuan BJP in Hindu lal ram din tuma an hmalak tumna pakhat, hnam leh sakhaw tihdan hrang hrang nuai bo a, kalphung inang veka min kal tir an tumna, Uniform Civil Code (UCC) pawh MNF hian an thlawp duh zel ang tih chu an ngaihdan a nih thu sawiin, hei vang hian Village Council, Municipal Council leh AMC inthlan kan hmachhawn turah pawh Hindu lal ram dinna atana theihtawp chhuahpuitu MNF party chu Mizoram mipuiin kan hnawl a, kan paihthlak ngei ngei a ngai a ni, an ti bawk.