Thisen pekchhuah dan hnual nana hmang lova tlawmngaia thisen pe zel turin mipuite sawm

Association for Voluntary Blood Donation (AVBD) General Hqrs. chuan sawrkar Blood Bank atanga thisen lakchhuah dan tur chungchanga ruahmanna siam thar chu uluk takin an thlir mek tih sawiin, Mizo mipuite chu chi-ai lo tur leh midang tana thisen pek kawngah hnual phah nana hmang lo turin an chah.

Hemi chungchanga thuchhuah an siamah AVBD chuan thisen mamawhtu damlote'n a hun taka thisen an dawn chu an duh ber a ni tih sawin, chutiang a nih theih nan chuan an phak tâwkah hma an la ve reng bawk tih an sawi a. Blood Bank atanga thisen lakchhuah chungchangah pawh a tul angin Health Department hotute pawh dàwr zel tum a ni tih tarlangin, “Thisen pek chungchang hi thih leh dam kar thil a nih avangin mipui/damlote mamawhna hriain kan sawrkar pawhin mipui thatna tur a ngaihtuah zel kan beisei a, thisen mamawhtu damlote tana remchang leh tha ber turin thil a kal zel kan beisei tlat a ni,” tiin “Thu léngvâk tam tak awm karah Mizo mipuite chu chi-âi mai lo tur leh thisen pek kawngah pawh hnual phah nan hmang lo a, thahnemngai taka thisen pe chhunzawm zel turin kan ngen a; i tang mar zel ang u,” an ti bawk.

AVBD chuan kum 2019 (calendar year) chhung khan Mizoram pumah thisen pek lamah hmasawnna duhawm tak kan hmu tih pawh sawiin, a thlawna thisen pek (voluntary blood donation) lamah kum hmasa lam aiin nasa takin hma kan sawn thu leh Voluntary Donation hi 89.47% lai a tling thei tih an sawi a. Mi nunna chhanna tur leh mi dangte tana malsawmna ni tura Mizo mipui, phal taka thisen petute zawng zawng chungah lawmthu sawiin, kumin 2020-ah pawh thahnemngai leh zuala tan la a, uar zawka thisen pe zel turin Mizo mipui, a bik takin thalai zawng zawngte an sawm a. January-December, 2019 chhung khan Mizoram puma Blood Bank 11-ah thisen Unit 30,232 pek niin, chu'ng zinga Unit 27,049 chu pek bik nei loa a thlâwna pek (voluntary donation) niin, chu chu thisen pek zawng zawng atangin 89.49% a tlin thu an sawi a. Kum 2019 chhung vek khan Mizoram pumah Blood Bank 11-te'n Blood Donation Camp vawi 507 neiin chung ah chuan Thisen Unit 20,270 lai hmuh a ni tih an tarlang.

Nikum chhunga Mizoram-a Blood Bank 11 zinga Voluntary Donation thatna ber chu Civil Hospital, Aizawl Blood Bank a ni a, thisen an dawn zawng zawng Unit 15,694 atangin Unit 14,613 chu Voluntary Donation niin, 93.11% a tling a. Voluntary donation hi District Hospital, Champhai-ah 92.73%, District Hospital, Siaha-ah 92.15% leh District Hospital, Serchhip-ah 90.88% a tling bawk tih sawiin, kum 2019-2020 (financial year) chhung atana Voluntary Donation Target an siam chu 90% niin hei hi tlin a nih theih nana theihtawp chhuah turin an sawm bawk.