Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

NIT Mizoram-a hna kal mek Forest Clearance neihloh vangin ti thuanawm dawn lo

Lengpui-a Mizoram National Institutes of Technology (NIT) hmun tur chu nimin khan Environment Forest and Climate Change Minister, TJ. Lalnuntluanga chuan a tlawh a, Forest Clearance an neih loh vanga hnathawh tihthuanawp a nih loh tur thu a sawi.
Lengpui-a NIT hmun tur hi kum 2014 khan buaipui tan a ni a. Helai hmun hi Lengpui VC-in Land Revenue and Settlement kaltlanga an pek niin, a hmun thenkhat hi Forest Area huamchhung a nih avangin hna chhunzawm theih a ni rih lo a ni.
Nimin-a helai hmun enfiahtu Forest Minister, TJ.Lalnuntluanga chuan Chief Minister, Zoramthanga'n Department leh Department inkara inbiakpawhna lam that tawk loh vanga hmasawnna tihthuanawp chu tha a tih loh avangin, Lengpui-a NIT hmun chungchanga harsatna thleng pawh hi tunhnai khan Higher and Technical Education Department, Environment Forest and Climate Change, Law Department leh NIT hotuten sawiho in, engemaw inhriatthiamlohna awm vanga harsatna an neihte sutkian dan tur an ngaihtuah tih a sawi a, “Inbiakremna kan neih danin NIT hian Forest Clearance nei rih lo mahse, Forest Department chuan harsatna siam lova hna an thawh chhunzawm an phalsak dawn a. Hetih rual hian NIT lam pawhin thil tihfel ngai awmte chu hnathawk chungin an buaipui ang a. Dan-in a sawi anga thil pawimawh neih ngaite an buaipui dawn thung a ni,” a ti.
NIT hotute chuan tunah hian Campus chhunga inkalpawhna kawng leh a hungna chu siam zawh thawkhat a ni tawh tih nimin a helai hmun tlawhtu Minister hi lo hrilhin, Building sakna tur sum pawh Central atanga pekchhuah mai theih tura ruahman fel sa a ni tawh tih an sawi a. Hetih rual hian Forest Department lam nen engemaw harsatna an neih avangin sum hi an dawng thei rih lova, tunah inhriatthiamnaa Forest Department lamin hnathawh an phalsak tak avangin sum hi an dawn thuai an rin thu leh hna pawh tan theih thuai an inbeisei tih an sawi. NIT hotute chuan, a tirah an Campus chhung hmun thenkhat chu Forest Reserved Area a ni tih an hriat loh thu leh an phalna lak a ngai tih an hriat loh thu an sawi a. Minister tawiawmtu Forest Department hotute pawhin, harsatna siam an tum hrim hrim vanga tun dinhmun hi thleng an nih loh thu leh NIT lam hian hmalak phalna an dil a nih chuan remtihsak tura an lo inruahman lawk thu sawiin, dilna an hmuh tak mai loh avangin dan anga hmalak a ngaih bawk si avanga hetiang hi lo ni ta a nih thu an sawi. NIT ram chungchanga a kaihhnawih Department hrang hrangin inhriatthiamnaa hmalak chhunzawm an remtih avang hian a ram chin tichiang turin tun thla ni 24 hma hian Joint Verification neih a ni dawn a ni.

Comments

Popular News (Last 30 Days)