Mizoram-ah zirna a tlahniam nasa hle - Education Minister

School Education Minister, Lalchhandama Ralte chuan Mizoram-ah zirna a tlakhniam nasat thu leh a vei thu sawiin, “Zirna hian hmun sang chang leh sela, zirlaite hi kan ram nghahfak an nih avangin khawtlangin i duat thar ang u,” a ti bawk.

Nimin a Govt. Chalrang Middle School Golden Jubilee lawmna a hmanpuina ah he thu hi sawiin School Education Minister, Lalchhandama Ralte chuan Mizoram-ah zirna a tlakhniam nasat avangin kawng hrang hrangah tan lakna tur a tam thu a sawi a. “Khaw hrang hrangah zirna In leh compound te thildanga hman atan khawtlangin an it deuh mai zel a. Khawtlang hian neitu thinlung puta humhalh a tul a, heti lama pianthar hi a tul hle a ni,” a ti a. Mizoram a Zirlaite chu India ram hmun dangah pawh zahpuiawm lo an nih a, mahni inrintawkna nena khawvel an hmachhawn theih a ngai a, chutiang tura inchherchhuah pawh a ngai a ni, a ti. Govt. Chalrang Middle School hi January 16, 1970 khan din a ni a, nimin-a an kum 50 tlin lawmna ah hian he School-a lo thawk tawh zirtirtu thahnem tak an tel bawk a ni.