Mizoram Pradesh Congress Committee (MPCC) chuan Aizawl-a Republic Day lawmna ah Mizoram Governor in Congress sawrkar hnathawh that zia a tarlang niin an sawi.
Nimin-a thuchhuah an siamah MPCC Media Department chuan India Republic Day lawmna, January 26, 2020-a Assam Rifle Ground, Aizawl-a neihah Mizoram Governor, P.S. Sreedharan Pillai chuan Economic Development lama Congress sawr-kar liam ta hnathawh that zia chiang takin a tarlang nia sawiin, ‘Kum 2012-2018 chhung khan Mizo-ram hmasawnna chu chawhrualin 12.75% niin, hetiang taka kal tluan hi kan la nei ngai lo a ni,’ tia a tarlan bakah ‘Hetiang ang zela kan kal chho a nih chuan kum 10 chhung chuan retheihna um bovin, state intodelh leh sum lakluh inrualkhai tak kan la ni mai ang tih ka ring nghet tlat a ni,’ a ti bawk niin an tarlang a.
Governor in a sawi ang hian Congress sawrkar lai, kum 2012-2018 chhunga Mizoram hmasawnna, chawhruala 12.75% zet a ni chu Mizo-ram-in a la tawn ngai loh a nih thu leh India rampum hmasawnna ai pawhin a sang zawk hial nia tarlangin MPCC chuan, “Governor-in a sawi ang hian Congress sawrkar lai anga hmasawnna hi a kaltluang a nih chuan kum 10 chhungin retheihna um bo a ni ang a, Mizoram hi State intodelh tak kan ni thei ngei dawn a ni,” an ti a. He hmasawnna thleng mek hi MNF sawrkar itan a chhawmnun zel an duh thu leh hei hi chona-ah ngai se an duh bawk tih tarlangin, chutih rualin India ramin economy tlakhniamna nasa tak a tawn lai a nih avangin sawrkar pawisa (public money) an hman danah MNF sawrkar chu inenfiah tura an duh thu an tarlang a. Congress sawrkar khan tihsual leh rah pelh engemaw zat a nei chungin hmasawnna kawngah leh sawrkar sum leh pai enkawlna kawngah chuan theihtawp a chhuah ve thin tih an tarlang bawk.
Comments
Post a Comment