Ralkhel dar a ri tih sawi

ZPM chuan nimin khan Aizawl-a an Office-ah Chhung Inkhawm neiin he huna thu sawitu Lalduhoma chuan, “Central sawrkar kal zel dan tur han en hian ‘ralkhel dar’ a ri a, inralrin a hun takzet a ni tih hi a chiang khawp mai,” a ti.

Serchhip bialtu MLA, Lalduhoma hian BJP chuan India ram Economy chawisan ai chuan anmahni BJP party sawhngheh leh tih hausak an tum zawk nia sawiin, “Company liante nen tangrual in an intilawm tawn a, Corporate Tax nasa takin an tihniam a. Electoral Bond kawngka zau takin an hawng thung a. Kum 2018-2019 chhung ringawtin BJP hian Party sum cheng vbc. 1450 an nei hman a, tun dinhmunah phei chuan a tam tawh hle ang,” a ti a. India ram Economy a tlakchhiat mek thu sawiin, “Revenue nasa takin a tlahniam a, Growth Rate-ah Bangladesh pawh kan phak ta lo. Kum 45 chhunga Unemployment Rate san ber kumah min hnuk lut mek. Delhi tlang-a Budget lipui, khawhlut pur pur, liam zur zur chu thal tur awm lovin a kang chat mek a ni,” a ti.

Central sawrkar rorel duhdan chu a awpbet zawng hlir anih thu sawiin Lalduhoma chuan, “RTI Act leh UAPA (Unlawful Activities Prevention Act) an amend a, mimal pawh Terrorist-a puan theih anih bakah, Media-te pawh an chep sawt hle. Article 370 an paih a, Armed Forces Special Power Act (AFSPA) Nagaland-ah an puang a, Disturbed Area-ah an dah a ni,” a ti a. “BJP sawrkar hian an tih leh tur zingah Uniform Civil Code, Ram Mandir sak leh sakhaw danga inleh khapna (Anti-Conversion Law) te hi a ni,” a ti a. Mizo-ram hian kan ram, kan hnam, kan sakhua humhalh ngam sawrkar tha kan neih a ngai tih sawiin, “Kan rama rorellai party-in kan hnam him lohna tur an thlawp tlat mai hi a vanduaithlak a, kan MP hi a mimalin kan dem lo. A vote tirtu party hi kan dem zawk a ni. Ralkhel dar a ri a, inralrin a hun takzet a ni,” a ti bawk.