Coronavirus leng mek India rama a luh loh nan hmalak niin mipuite chi-ai lo tura chah an ni

Tunlaia China-a hritlang leng mek, Coronavirus chungchangah nimin khan Union Health Secretary, Preeti Sudan hovin India ram state zawng zawng huapin Video Conference neiin India rama he hri lo lut tur ven dan tur sawiho a ni a, Mizoram atang pawhin sawrkar Doctor thiam te an tel a ni.

He Video Conference hi Coronavirus hrileng dona beihpui thlakna a tel Central Ministry hrang hrang – Ministry of Home Affairs, Civil Aviation & Shipping-a Secretary-ten an hmanpui bakah Nepal ram nena ramri nei State panga Chief Secretary ten an hmanpui a, he hunah hian Union Health Secretary, Preeti Sudan chuan state hrang hrangte chu he natna tha taka lo dolet tur leh a tul anga hma la tura chahin, State hrang hrangte chu coronavirus avanga damlo nia rinhlelhte hmuhchhuah leh enkawl kawngah ramchhunga an rawn luh theihna hmun hrang hrang, Thlawhna tumhmun leh Lawngchawlhna neite chu a bik taka inthlahdah lo turin a chah a ni.
Nimin thleng khan Coronavirus vanga damlo hmuhchhuah zat hi China-ah ringawt pawh 2744 awm tawhin mi 80 laiin an thihpui tawh a. Thailand, Japan, South Korea, Vietnam, Singapore, Malaysia, Nepal, France, Australia leh USA-ah te damlo hmuhchhuah zat chu 33 an tling tawh bawk a. Hri lenna hmun Wuhan bawr velah hian India ram atanga lehkha zir engemaw zatin tunah hian Kerala State an rawn pan mek a. Heng hmun atanga khualzin ramchhunga rawn lutte chu hmaih awm hauh lovin an hriselna en dik vek zel an ni bawk.
Hemi denchhen hian Health Department chuan thuchhuah siamin hrileng darh zel kawngah mipuite mawhphurhna a san thu sawiin, ram pawn atanga zin hawte chu hritlang leh khawsik an neih chuan damdawi In pan vat tura an duh thu an sawi a. Coronavirus hi hritlang chikhat niin awlsam taka hritlang hnaptui leh hahchhiau atanga kai theih anih avangin a ti punlun lo tur leh he natna laka inven nan hian tui leh sahbawn emaw, alcohol based hand washing ang chi a kut sil ngun te, khuh leh hahchhiau laia hnar leh hmai rawmawl a hup te, sa leh artui hmin taka chum chauh ei te, a vei ni a rinhlelhte bula awm hnaih loh te leh ran leh ramsa hnaih loh te hi a pawimawh hle a ni.
India ram State thenkhatah he natna avanga damlo rinhlelh engemaw zat awm mah se, tun dinhmunah finfiahna ala awm loh avangin mipuite chiai lo turin an chah bawk a ni.

Comments

Chhiar Hlawhte