Lok Sabha MP in Zokhawsang hmun a tlawh

Mizoram Lok Sabha MP, C. Lalrosanga chuan nimin khan Zo-khawsang-a Assam Rifles awmna hmun tlawhin tun thlenga Aizawl khawpui atanga an insawn chhuah theihloh chhan te a enfiah.

Zokhawsang a tlawhna ah hian Assam Rifles hotute chuan Lok Sabha MP hnenah hian Zokhawsang-a insuan tura harsatna an tawh lian ber chu sipai ho chenna tur Quarters sak zawh loh a la ni leh sak zawh tawh ho pawh luah ngam loha chhia tam tak a awm vang a ni tih an lo hrilh a. Tun dinhmunah Office building bik chu 90% sak zawh tawh a nih thu leh sipaite chenna tur Quarters hi 60% sak zawh a nih thu lo hrilhin, a sak zawh hna hrim hrim chu kumin April thla ah zawhfel theih a nih an rin thu an sawi rualin sak zawh tawh sa zingah thalo lai a tam avanga sak that leh a tul nual tur thu an sawi a ni.

Lok Sabha MP hian heng Quarters sak mek te hi a hmunah a tlawh nghal a, heng Quarters satu Engineering Projects India Limited (EPIL) te hnathawh dan chu lungawithlakloh a tih thu a sawi a. Type-II Quarters Block 19 sak tur niin Block 16 sak zawh tawh a ni a, Block thum (3) sak mek a ni a. EPIL ten In an sak hi a tira ruahman dan (design) nen a inmil lo nasa hle tih Assam Rifles hotute hian an sawi a, an sak zawh tawh sa an hnena hlan chhawn an tum pawh an la lak ngam rih loh thu sawiin, building thenkhat phei chu a beam awm tura ruahman awm ta silo pawh a awm a awm nual tih an sawi a. Block tinah hian chenna In 16 awm tur a nih rualin thenkhatah chuan a kim lo a, an sak zawh tawh sa ho pawh a chhawng chung ber chu tumahin an luah ngamlo tih an sawi bawk. Officer ho Ouarters an sak pawh a thalo hlawm hle tih an sawi a, lirnghing na tak thlen theihna hmun a awm an nih avangin tuna a awm anga heng building te hi luah a huphurhawm thu an sawi bawk.

Sipaite chenna In bakah EPIL in sipai ramchhung inkalpawhna kawng (internal roads) an siam te pawh Lok Sabha MP hian enin, nikum September thla a siam ni mahse thla thum (3) pawh ralhma in kawng hi a chhe leh nasa hman hle tawh a ni tih Assam Rifles hotute hian an sawi a. An chenna hmun tur sak chungchanga EPIL hnathawh danah an lungawiloh thu Home Ministry lamah pawh an thlen tawh thu an lo sawi a ni. Assam Rifles te chuan an ramchhung hmun 15 lai mai mimal in an chuhpui thu pawh sawiin, Mizoram sawrkar pawhin a hriatpui tawh thu leh chinfel thuai a nih an beisei thu an sawi bawk.

Lok Sabha MP hian Zokhawsang panna kawng, leimin nasa takin a tihchhiat siam that hna PWD thawh mek pawh tlawhin Chief Engineer, Bowman-a hovin an lo dawngsawng a, leimin veng tura lung an rem chu kumin Fur hma in an zawh hman ngei tur thu an lo sawi a ni.