Latest News

Kumin atan Congress Bhavan hawnna neih a ni

Mizoram Pradesh Congress Committee (MPCC) pawhin nimin khan kumin atan Aizawl a Congress Bhavan chu hawngin an President, Lal Thanhawla chuan thu a sawi a ni.
Kum 2020 atana Congress Bhavan hawnna hunah hian MPCC President, Lal Thanhawla chuan Pathian in Congress Party chu Mizoram hmasawn nan nasa takin alo hmang tangkai tawh thin nia sawiin, “A duhzawng a kan awm zel chuan min la hmang zel ang tih ka ring,” a ti a. CAA chu Sakawlh aiin a hlauhawm zawk nia sawiin, “Politics ringawt pawh a ni tawh lo a, Sakhaw him leh him loh chungchang hril thei a nih daih avangin nimin lawk pawh khan Pulpit-ah ka sawichhuak hial a ni,” a ti a. ILP awmna State-te a huam tel lo an tih pawh innghahna tlak a ni lo tih sawiin, “Kan ILP-te hi he BJP sawrkar hian awlsam takin min thiahsak leh daih thei, Jammu & Kashmir-a an chet duh dan enin hei hi thil thleng thei reng a ni. Hindu lal ram dinna atana an hmalak tumna pakhat Uniform Civil Code, Hindu sakhaw tihdan mila min hruai an tumna te hi nasa lehzuala tawngtaina nen kan do a ngai dawn a ni,” a ti.
He hunah hian Rajya Sabha MP, Ronald Sapa Tlau pawhin Parliament-a CAB an buaipui dan sawiin, “MNF sawrkar dinhmun hi a khirh hle a, khulama an hotute BJP duhdana an awmin helamah Mizo mipui an lungawilo a, helam duhdana an kal dawnin khulam an lungawi leh bawk si lo a. Ngun taka an ngaihtuah hnuah Mizoram mipui duhdan ai chuan khulama an hotu BJP-te duhdan an ngaipawimawh ta zawk a. Mizoram mipui min phatsan ta a ni,” a ti bawk.

Comments

Popular News (Last 30 Days)