Kum 2019 chhungin thubuai 63 ziahluh awm

Kum kalta 2019 chhung khan Serchhip Police Station-ah thubuai 63 ziahluh a ni a, heng thubuai hrang hrang chhui hnuah mi 12 te chu thiamloh chantira tang tura an chungthu rel a ni.
Serchhip Police Station atanga report kan dawn dan kum kalta (2019) chhunga Serchhip Police Station-a thubuai ziahluh 63 zingah hian rukruk leh mi rawk thubuai chu a langsar ber niin thubuai 11 ve ve ziahluh a ni a, mi In rawk bikah hian thubuai lut 11 zingah thubuai 9-ah Chargesheet thehluh ni tawhin thubuai ngaihtuah mek 4 awmin chhui lai mek 2 a awm bawk a, mi 5 te chu thiamloh chantir an ni tawh bawk. Rukruk thubuai 11 ziahluh zingah thubuai 10-ah Chargesheet siam ni tawhin thubuai ngaihtuah lai 8 leh chhuilai 1 a awm a, mi 2 te chu thiamloh chantir an ni tawh bawk.
Serchhip Police Station a thubuai ziahluh langsar zual dangah MLP Act hnuaiah thubuai 8 ziahluh a ni a, MLPC Act hnuaiah thubuai 3 ziahluh a ni bawk. Hursualna laka naupangte venhimna Dan, POCSO Act hnuaiah pawh thubuai 4 ziahluh niin chargesheet 3 thehluh niin Final Report thehluh pakhat a awm a, Damdawi leh ruihhlo hmansual khapna Dan, ND&PS Act hnuaiah thubuai 5 ziahluh a ni bawk a, thubuai ngaihtuah lai 4 bakah chhuilai mek 1 a awm bawk. District Magistrate ten khapna Dan an siam bawhchhia te hremna, 188 IPC hnuaiah thubuai ziahluh 3 awmin thubuai ngaihtuah lai 1 a awm a, mi 2 thiamloh chantir an ni bawk. Motor Accident chungchangah thubuai 2 ziahluh niin pawngsual thubuai 4 ziahluh a awm bawk.

Comments

Chhiar Hlawhte