SDSC thutkhawm neih a ni

Serchhip District Sports Committee (SDSC) chu nimin khan Serchhip Venglai-a an Office-ah thukhawmin thil pawimawh hrang hrang an sawiho.
Nimin a SDSC thutkhawm hi an Chairman, K. Tlangthanmawia chuan kaihruaiin Serchhip khawpui paltlang, NH. 54 in Bukpui-a Tennis Court a tihchhiat dawn avang leh Serchhip P&E Veng-a Tennis Court chu a chhiat tak avanga Serchhip District Tennis Association ten an hmun nghet tur an dil chu Sports Complex ram-ah dah turin a hmunhman enfiah nise an ti a. Hemi rual hian Serchhip District Rifles Association (SDRA) in Sports Complex rama hmun nghet an dil pawh enfiah nise tiin tukin hian enfiah nghal tura ruahman a ni.
Hei bakah hian tun thla ni 28 atanga Siaha-a Inter-District Volleyball Championship khelh turah Serchhip District Volleyball Association (SDVA) in mipa leh hmeichhe Team a tirh tur chu sum faiin tanpuina hlan nise an ti a. SDSC Office an luah mek chu SDSC-a tel pawl hrang hrang ten rualkhai tak leh tangkai taka an hman tlan theihna turin Term and Condition siam nise, a building pawh a theih anga thawm-thain tih changtlun nise an ti bawk.
Serchhip District Sports Committee ah hian Mizoram State Sports Council hnuaia inziak-lut Sports Association hrang hrangte an tel a ni.

Comments

Chhiar Hlawhte