MZP in ILP enfiah hna thawk

MZP chuan nimin khan Aizawl khawpui chhung hmun hrang hrangah Dan lova Mizoram a Hnamdang awm te dapchhuah hna thawkin ILP neilo mi 70 vel man an ni.

MZP hian Aizawl khawpui chhung Veng hrang hrangah Mizoram-a Dan lova hnamdang awm te dapchhuah hna an thawh thu leh Inner-Line Permit nei lova Mizoram a hnamdang awm mi 70 chuang an man-chhuah thu an sawi a. Sawrkar leh thuneitute pawhin theihtawp chhuaha hma an lak mek lai a, nikhat hnatlanna a hnamdang permit nei lova khawsa leh dan lova sumdawng thahnem tak man chhuah tur an awm chu pawi an tih thu sawiin, heng hnamdang dan lova khawsate hi permit neilo bakah anmahni leh anmahni lo in sponsor-te leh hnamdang vekin an lo sponsor te an ni hlawm tih an sawi a. Hnamdang dan lova khawsa a hmuhchhuah te chinchang chu ngun takin an enzui dawn tih pawh sawiin, thawnkir (push back) an nih dan pawh MZP chuan Vairengte thleng a umzui dawn thu leh Mizoram chhunga dan lova hnamdang sumdawng te dapchhuakin a tul angin hma an lak zel dawn thu an sawi a, hnamdang dan lova Sumdawng te dapchhuah kawnga Mizo mipuite thlawpna a ngen takmeuh tih an sawi bawk.

MZP chuan India Danpui-in a bik taka min humhalhna dan, Inner Line Permit(ILP) hi a nihna ang taka hmang tur leh a pekchhuah dan chungchangah pawh fimkhur lehzuala kalpui turin thuneitute a ngen nawn leh tih an sawi a. Ram leilung faten khawpui chhungah In luahtur harsa taka an zawn thin lai a, dan lova awm hnamdang ten awlsam taka inluahtur an hmu mai thin chu pawi an tih thu leh Mizoram chhunga Veng/Khua Local Council/Village Council thuneitu zawng zawngte hnamdang ILP issue chungchangah document felfai lo chu hriatpuina lehkha lo pechhuak tawh lo tura an ngen thu an sawi bawk.