District Council in hlawh ah Budget hmang tam

Mizoram chhunga Autonomous District Council pathum - Mara, Lai leh Chakma Autonomous District Council-te chuan an Budget atanga za zela 90 chuang chu hnathawk hlawhah an hmang.
District Council and Minority Affairs Department thuneitute hnen atanga thudawn danin mipui hmasawnna hna (developmental works) thawhna tura sum awm mang lo khawpin an kumtin budget atanga za zela 90 chuang theuh chu hnathawk hlawhah an hmangral thin a. Hetiang a nih avang hian Autonomous District Council-te enkawlna dan Constitution-a scheduled parukna tlawhchhanin Mizoram Larsap chuan August 16, 2016 khan thupek a chhuah a, Larsap phalna la hmasa lo chuan hnathawk tur lak a khap a. Autonomous District Council Sawrkara hnathawktu lak, an awmna tur hmun siam sak leh sawn chungchang hi Mizoram sawrkar thuneihna a ni lova, Autonomous District Council-te thuneihna a ni.
Autonomous District Council 3-a hnathawktu lak chungchang hian sawi a hlawh hle a, hnathawktu indaihlohna leh mamawhna aiin thuneihna chelhtute'n an chhungte leh an mi duhsak zawngte vurna atan an hmang nasa ni a sawi a ni a. Chakma Autonomous District Council-ah phei chuan sawrkar hnathawk lak dodalna avang hian tharum thawhna hian a thleng fo tawh a. ADC pathuma hnathawkte hian hlawh lak theih loh chang an nei fo tawh bawk a ni.

Comments

Chhiar Hlawhte