Mizoram leh Bangladesh ramri hung hna la zofel lo

Mizoram leh Bangladesh ramri KM 318-a thui hung hna thawh mek chu kum 2012-2013 chhunga zofel turin Ministry of Home Affairs-in bituk mahse tun thlenga zawhfel a la ni lo.

Home Department hotute hnen atanga thudawn danin Mizoram leh Bangladesh ramri hung hna thawktu hian a huna an zawh hman loh avangin Ministry of Home Affairs chuan nikum March ni 31-a zo tur khan a pawhsei sak a. Mahse, an la zawh hman chuan loh avangin pawhsei leh a nih rin a ni. Mizoram leh Bangladesh inrina hung avang hian Lunglei District-a mihring chenna In engemawzat chu ramri hungna pawn lamah an awm chungin an nitin khawsak kawngah harsatna lian tham an tawk lem lova. Harsatna an tawh ber chu zan lama ramri an khar thin vang niin Lunglei District Bawrhsap pisa atanga thudawn chuan a sawi a. Ramri hung pawna chenna In awmte chuan nikum khan Gauhati Hight Court-ah thubuai an thehlut a, Court thutlukna nghah mek a ni a. Tun dinhmunah hian Ministry of Home Affairs chuan ramri hungin harsatna a siam sak chhungkua te tuamhlawmna emaw, zangnadawmna emaw pek tur ruahmanna a siam rih lo niin Home Department hotute chuan an sawi a ni.