Latest News

Chief Minister in Union Minister hrang hrang kawm chhunzawm zel

New Delhi a cham mek Chief Minister, Zoramthanga chuan nimin khan Union Minister of Textiles, Smriti Zubin Irani-i chu a Pisa-ah hmu in, Mizoram leh India hmarchhak state dangte a Geotechnical Textile hman chungchang a sawipui.
He an inkawmna ah hian Chief Minister chuan tuna India hmarchhaka Geotechnical Textiles Promotion Scheme kallai mek chu kumin March thla-ah a tawp dawn tawh avangin, he hmalakna hi chhunzawm zel a nih theih nan hmalak sak turin Union Minister chu a ngen a. Khawtlang hman tur Tuizem lian atan te, lo leh leilet a tui mamawh dahkhawlna tur leh leimin tur venna atan te leh kawng siamna atan te heng Geotextiles hi India hmarchhak state leh a bik takin Mizoram tan an tangkai thu Chief Minister chuan sawiin, Horticulture sector atana geotechnical textile hman tangkaina tura proposal lo thehluh a nih tawh thu a sawi bawk. Hei bakah hian Chief Minister chuan Ministry of Textiles chuan DoNER hnuaiah 10% Gross Budgetary Support for North Eastern Region atan sum la hmanloh cheng vbc. 150.25 a neih chu heng proposal thehluhte tihhlawhtlin nan hian hman a nih theih nan hma lak sak turin a ngen a ni.
Chief Minister, Zoramthanga hian niminpiah tlai khan NITI Aayog Vice Chairman, Dr. Rajiv Kumar chu a Office-ah kawmin Mizoram hmasawnna tur thil pawimawh hrang hrang a sawipui bawk a. Chief Minister hian Mizoram sawrkarin Aizawl khawpui chhunga Public Transportation indaihlohna tiziaawm tura Aerial Cable Car siam tura rawtna a lo thlen tawh chu NITI Aayog in ngun taka a zirchian hnuah siam theih ngei nia an hmuh zia leh sum mamawh tur pawh ruahmanna siam nghal a nih thu a thlen a. Ruahmanna ang chuan Cable Car hi |huampui atanga Solomon's Temple (East-West Corridor) a kal leh Durtlang atanga Kulikawn (North-South Corridor) kal awm tura tih a ni. NITI Aayog Vice Chairman chuan Ministry hrang hrang kokhawmin he rawtna hi a tihlawhtlin theih dan tur sawiho fel a nih tawh thu te, sum mamawh tur pawh Ministry pathum Secretary ten a lakkhawm dan tur ngaihtuahin ruahmanna an siam tawh thu Chief Minister hi a hrilh a ni. Cable Car Service siam hi a remchan dan leh tih theih dan tur zirchianna (feasibility study) lo neih tawh niin, a Final report duang turin NITI Aayog in a rawih Ernst and Young a mithiamte chu karleh hian Mizoram-ah an lo kal nghal tur thu NITI Aayog Vice Chairman chuan a sawi bawk.
Heng bakah hian Bamboo Link Road chungchang pawh sawiin Chief Minister chuan, 10% Gross Budgetary Scheme hnuaia hmar-chhak state te tana sum dah, khawih chet siloh chu a rang lama hmasawnna hna thawh theihna tura release a nih theih nan hma la turin NITI Aayog Vice Chairman chu a ngen a ni.

Comments

Popular News (Last 30 Days)