Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Chief Minister in Prime Minister hnenah Mizoram mamawh hrang hrang a thlen

New Delhi-a cham mek Chief Minister, Zoramthanga chuan nimin tlai khan Prime Minister Narendra Modi chu New Delhi-a a chenna In-ah kawmin Mizoram mamawh hrang hrang a sawipui a. Chief Minister thil thlen te hi theihtawp chhuaha alo bawhzui tur thu Prime Minister hian a sawi bawk.

Nimin a Prime Minister nen an inkawmna ah hian Chief Minister, Zoramthanga chuan Mizoram tana All India Service (AIS) Cadre hran siam tura hmalak pui vat turin Prime Minister chu a ngen a. AGMUT Cadre hnuaia Officer-te hi state hrang hrangah kum reilote te chauh awmin, an Service-na State ah an awm tlangnel tak tak hmanlo thin tih a sawi a. Hei vang hian mipui nunphung chiang takin an hre hmanlo a, khawtlang mamawh pawh an hrechiang hmanlo fo thin tih sawiin, State tan cadre hranpa neih a pawimawh thu a sawi. a ni
Hei bakah hian Chief Minister chuan nikum March ni 18-a State Legislative Assembly in The Mizoram Maintenance of Household Register Bill a lo pass tawh chu a rang lama hman a nih theih nan sawrkar laipui chu hmalak pui turin a ngen a. He Bill hi state chhunga chhungkaw tin chhinchhiahna tur pakhat niin, dan kalh a thiltih hrang hrang - ralthuam leh ruihhlo hralh ruk te, mihringa sumdawnna te, thil tawlhruk te, ramri kan ruk leh a dangte dona atana tangkai tak tur a nih tur thu leh hmalakna dang awmte nen a inkalh a nih loh thu a sawi bawk.
Chief Minister chuan Ministry of DONER leh North Eastern Council thawh dan chu felfai taka thliar a, India hmarchhak state mipuiten Ministry leh Council atanga hmasawnna hna puihna an hmuh thin chu tangkai thei ang bera hman a nih theih nana hmalak tul a tih thu a sawi a. Non Lapsable Central Pool of Resources (NLCPR) hnuaia hmarchhak state tana hmasawnna hna thawhna tur sum hman loha la awmte NITI Aayog leh Ministry of DONER ten Ministry of Finance in release thuai tura an lo dil tawh chu release thuai nih nan hmalak sak turin a dil bawk.
External Aided Project (EAP) chu sawr-kar tan sum hmuhna hnar tha tak a nih laiin Special Category State-te tan EAP hmuh a harsat chhoh tak dan leh funding pattern thlak a nih theih nan hmalak sak tur Chief Minister hian a ngen bawk a, 15th Finance Commission kaihhnawih thu pawimawh hrang hrangte a sawipui bawk a. AIIMS zulzuia Mizorama Medical College leh Hospital siam sawipui bawkin, Mizoram chauh nilovin India hmarchhak state zawng zawng leh hmundang atanga chhawr tangkai a nih tur thu a sawi bawk.
He an inkawmna ah hian Prime Minister, Narendra Modi chuan India hmarchhak State puma remna leh muanna a awm theih chu sawrkar laipuiin a ngaihpawimawh thu sawiin, Myanmar nen pawh inlaichhinna tha leh ralmuang tak ram in neih chhunzawm zel a duh thu a sawi a. Chumi atan chuan Mizoram chuan dinhmun pawimawh taka dingin Chief Minister pawh a pawimawh thu a sawi bawk.
Hemi hma niminpiah tlai khan Chief Minister hian Ministry of External Affairs-a Foreign Secretary, Harsh Vardhan Shringla leh a thawhpuite hmu in, ram thenawm Myanmar nen a inlaichinna leh a kaihhnawih thu pawimawh tak tak an sawiho a. Chief Minister chuan kum 2008 April thla a India leh Myanmar sawrkarin inremsiamna an ziah hnua KMMTTP thawh mek chuan zawh lam pan tawh mahse hmun thenkhatah, a bik takin Myanmar ram lama hna kal muang deuh awm chu chak zawka thawh a nih a, he project hi zawh thuai a nih nan India sawrkarin hma la se tiin rawtna a thlen a. Myanmar leh Asia chhimchhak ramdangte nen inlaichinna tha zawk India in a neih theih nana Act East Policy siam chuan hmarchhak State-te chu luhka pawimawh takah a siam tak avangin kawng hrang hrangah hmarchhak state te hi ngaihpawimawh leh zual a tulna a sawi bawk.

Comments

Popular News (Last 30 Days)