Zirna lamah MLA Fund 10% aia tam hmang tih sawi

Tuirial bialtu MLA, Andrew H. Thangliana chuan Education Minister-in MLA te Fund Education Sector-ah 10% theuh tal dah tura a ngen laiin a aia tam daih a dah thu a sawi.

ZPM in nimin-a Aizawl-a an Office-a Chhung Inkhawm an neih ah Tuirial bialtu MLA hian thu sawiin Inthlan dawna an lo sawi tawh, ‘Mipuiin awlsam zawka min dawr theih turin hun ka hmang ang’ an tih chu ti hlawhtling nghalin a bial chhung khaw lian ber, Kawnpui-ah In a luah lut nghal tih a sawi a, “Sawrkarin sum a neih loh em avanga MLA Fund min pek theih chhun tlemte chu mipuite tana tangkai thei ang ber turin kan hmang chho mek,” a ti a. Zirna lamah mipui phurrit chhawk turin MLA Fund atangin Kawnpui HSS-ah LDC te, naupang thawhkhawma rawih Thingdawl Middle School Teacher te chu an kum 1 chhung hlawh tur a ruahman mek tih sawiin, bial chhunga College awmchhun Kawnpui College Lecturer hlawh pawh Grant-In-Aid atangin an pe mek tih a sawi a. “Education Minister-in MLA te Fund Education Sector-ah 10% theuh tal dah tura min ngen laiin, kei chuan hei aia tam daih hi ka dah a ni. MLA Fund chhuah hma hauha Education atan 10% han in dil lawk te, MLA Fund tawrh ngei ngei tura budget lian tak awm si lova MLA Fund an han it ngawt mai te hi a mak hle a, state dangah thleng ve tak maw?” a ti bawk.