Latest News

Naktuk-ah MZP General Hqrs. hruaitu thlang dawn

Mizo Zirlai Pawl (MZP) chuan tunkar Nilaini, Nov. 6, 2019 khian kum hnih chhung atan MZP General Hqrs. hruaitu an thlang dawn a, kum dang aia fimkhur zawka kalpui tum a ni.
He an inthlanna neih tur chungchangah hian nimin chhun khan MZP General Hqrs. President, L. Ramdinliana Renthlei chuan Aizawl-ah thuthar thehdarhtute kawmin MZP inthlan lo awm tur hi felfai taka neia, Vote nei dik tak ten Vote an thlak theih nan MZP Election Commission chuan hma a la tih a sawi a. Tunah hian he inthlanna neih turah hian Vote nei thei 1010 an awm thu sawiin, MZP Hqrs. ten Vote 15 theuh, Sub-Hqrs. leh College ten vote 7, Hnam pual zirlai ten vote 20 theuh leh Branch ten Vote khat theuh an nei dawn tih a sawi a. Vote nei turte hi ID hmanga kalpui niin Vawiin atang hian zing dar 6:00 atanga ID hi pekchhuah tur a nih thu leh ID pekchhuah loh te chu tihchhiat a nih dawn thu sawiin, ID pek hnua thil diklo ti an awm chuan action lak tur a nih thu a sawi a. Kum danga tih ngailoh angin vote thlak tur Hall chhunga an luh vek hnuah Hqrs,. Sub-Hqrs, Branch, College leh Hnam pual mal theuhte chhiar tur a nih thu a sawi bawk.

MZP General Hqrs. inthlan lo awm turah hian President post chu B. Vanlaltana leh Michael Lalramsanga ten an chuh a, Vice President chu Peter Chhangte leh R. Lalrokima ten chuhin Gen. Secretary chu H. Lalthianghlima leh Lalnunmawia Pautu ten an chuh a. Asst. Gen. Secretary pawh Jacob Lalmuanpuia leh Ricky Lalchhandama ten chuhin Treasurer-ah Andrew F. Lalramnghaka chu chuhtu an awm lova, Finance Secretary chu Chinkhanmanga leh Sanghmingthanga ten an chuh bawk.

Comments

Popular News (Last 30 Days)