Zirlai naupang thiamna tak tak nei leh mihring chhawrtlak chherchhuah a tul - H&TE Minister

Higher & Technical Education Minister, Dr. R. Lalthangliana chuan ziak leh chhiar thiamna, literacy a pawimawh rualin a aiin zirna kawnga a pawimawh lai ber chu quality zirna a nih thu a sawi a. Zirtirtuten, zirlai naupang thiamna tak tak nei leh mihring chhawrtlak an chherchhuah a tul thu a sawi bawk.

Mizoram College Teachers' Association (MCTA) General Conference vawi 41-na nimin-a Mizoram Hindi Training College (MHTC) Durtlang-a neih khuallian nia a hmanpuina ah he thu hi sawiin Dr. R. Lalthangliana chuan quality zirna tel lovin hna hmuh a harsat tawh thu leh zirtirtuten zirlai naupang thiamna tak tak nei leh mihring chhawrtlak an chherchhuah a tul thu sawiin, chutianga tan la turin College zirtirtute chu a fuih a. College tha tehfung NAAC Accreditation in College dinhmun nasa takin a siam danglam nia sawiin, tunah Mizoram-a College tam zawk B Grade ni mekte chu A Grade a an inhlankai thei nan College zirtirtute chu tan la turin a fuih a. Zirtirtute tan mahni zirlai naupangte hriatchian a pawimawh thu sawiin, zirna kawnga zirlai hnufum bikte a bika kaihhruaina in chung zirlai dinhmun a siam that thei thu a sawi tel bawk.
Higher & Technical Education Minister chuan College zirna chungchang sawiin RUSA kaltlanga College hmunhma te tih changtlun a nih mek thu te leh Asst. Professor 70 lak anih thu sawiin, Part-Time a thawk mek te chu Contract a chingfel chho mek a ni, a ti a. Zirtirtu leh Non-Teaching Staff, a pawimawh zual bik indaihlohna chu a hriatpuiin heng post ruak te hnawhkhah anih thei nan Sawrkarin tan a la mek tih a sawi a. Principal post thenkhat ruak in College inrelbawlna kawngah harsatna a thlen chu a ngaipawimawh thu pawh a sawi a, heng post te hi a rang thei ang bera lak a nih tur thu a sawi bawk.
MCTA Vice President, Lalbiakzuala kaihhruai MCTA Conference hian 7th UGC Pay Arrear belhkhawm cheng vbc. 39 bawr vel Central Sawrkarin a pek chu lawmawm an tih thu sawiin, Arrear an lak thei nana Minister in theih-tawp a chhuahsak avanga an lawm thu an sawi bawk.
MCTA hi Mizoram Sawrkar hnuai awm College 24 a zirtirtute inzawmkhawm pawl a ni a, Member 617 a awm a, heng te hi Professor 28, Associate Professor 405 leh Assistant Professor 184 te an ni. Kumin chhungin Member 15 pension a chhuak an nei a ni.

Comments

Chhiar Hlawhte