Shelter for Urban Homeless (SUH) hnuaiah UD&PA in Serchhip-a Home pahnih tanpuina an hlan

Serchhip-a Urban Development & Poverty Alleviation (UD&PA) Department chuan nimin khan Serchhip-a Adult  Rehabilitation Centre (ARC) Hmangaihna In leh Old Age Home, Beiseina In-ah te Shelter for Urban Homeless (SUH) hnuaia Operation & Maintenance Fund atangin tanpuina pawisafai an hlan.

Heng Home pahnih te tana tanpuina hlanna hun Serchhip District Urban Development Officer (DUDO) Office Chamber-a neih ah Vanthangpuii, District Urban Development Officer chuan Shelter for Urban Homeless (SUH) chuan In leh lo neilo, riahna tur neilo leh enkawltu neilo te chhawmdawl chu a tum a nih thu sawiin, Shelter hi chi 4 a awm thu leh Serchhip-ah chuan Special Shelter chauh kan neih thu sawiin, heng te hi tun tuma tanpuina an hlan, Old Age Home leh Adult Rehabilitation bakah Orphanage Home te an nih thu a sawi a. Orphanage Home te hi Social Welfare Department hnuai ami an nih avangin SUH atang hian tanpuina pek theih an nih loh thu a sawi a. Special Shelter-ah hian In leh chenna tur mumal neilo te, Kum upa enkawltu neilo te, Rualbanlo enkawltu mumal neilo leh damlo enkawltu neilo te huam thei mah se Serchhip-a rualbanlote enkawlna chu School anga kalpui a nih avangin kum dangah tanpuina lo pe tawh mah se kumin chuan pek theih an nih tawhloh thu a sawi bawk.

District Urban Development Officer chuan Operation & Maintenance Fund atang hian kum hmasa lamah ARC Hmangaihna In hi Rs. 1,68,000/-, Old Age Home Beiseina In chu Rs. 60,000/- leh Shalom Special School chu Rs. 420,000/- pek an nih tawh thu sawiin, kumin hian ARC hi Rs. 36,000/- leh Old Age Home hi Rs. 60,000/-, a vaiin Rs. 96,000/- pekchhuah a nih thu a sawi a. Operation & Maintenance Fund hi thawktute hlawh leh Staff Quarters cheithatna atan leh thawktute hamthatna atan hman a remloh thu sawiin, an enkawl mekte hamthatna atana hman tur a nih thu a sawi a. He ruahmanna hi Supreme Court thuchhuak anga kalpui a nih thu pawh sawiin, hei vang hian an sum hmanna te reng reng chu State sawrkar-ah thehluh leh vek tur a nih avangin Dec. 13, 2019 ralhmaa Receipt leh Voucher bakah Cashbook te chu UD&PA Department Office-a thehlut vek turin a chah bawk a ni.

Nimin a tanpuina hlanna hunah hian ARC Hmangaihna In leh Old Age Home Beiseina In a thawktute leh Board enkawltute telin, hetianga sawrkar in an tana ruahmanna a siam thin chu lawmawm an tih thu an sawi a, tanpuina an dawn theihna tura hma lak saktu sawrkar thuneitute leh UD&PA Department-a thawktute chungah an lawm hle tih an sawi bawk. Tun dinhmun ah Adulot Rehabilitation (ARC) Hmangaihna In-ah hian mi 3 enkawl mek niin Old Age Home Beiseina In ah hian mi 5 enkawl mek an ni bawk.