CM in Saitual DC Office hmun tur a tlawh

Chief Minister, Zoramthanga chuan nimin khan Saitual District DC Office Complex hmun tur leh sawrkar Office dangte awmna tura ruahman chu Saitual DC leh SP te tawiawmin a tlawh.

Chief Minister hi Saitual DC, C. Lalpeksanga leh a thawhpui ten lo dawngsawngin Saitual KVI ram chu Sawrkar hmun (Govt.Complex) atan a rem dawn em tiin hmunhma an thlithlai a, Chief Minister chuan hmun zau leh rem tak, Sawrkar Building tam tak len theihna tur khawtlangin kawhmuh tur an lo nei chu lawmawm a tih thu sawiin, Sawrkar Building lo awm tur leh awm tawh zawng zawng pawh mipuite tan dawr a awlsam zawk nan hmun khata awm tha a tih thu a sawi a, “KVI hmunin a dawl theih chin chu Sawrkar Pisa kan dah vek ang,” tiin tiin hma la turin Sawrkar Official te pawh Chief Minister chuan a chah nghal a. Deputy Commissioner Office leh a thawktute pawh tluang taka hna an thawk chho thei zel chu lawmawm a tih thu leh, hmabak tam tak la awm te chu sawrkarin theihtawp chhuahin tihfel zel a tum thu a sawi bawk.

Chief Minister hian Keifang-a Pioneer hmun hlui pawh tlawh nghalin SP Office hmunah leh Circuit House, tualzawl zau tha tak nei sak nan ruahman nise a duhthu khawtlang hruaitute a hrilh a. Saitual District chu District dingtir a nih avangin a hnufual ngawt bik tur a ni lova, kawng engkim ah District hmasa te el pha turin kawng dap a nih tur thu leh chei a nih tur thu a sawi bawk.