Vawiin ah SHC inthlang dawn

Sinlung Hills Council (SHC) inthlanpui vawi khatna chu Vawiin hian neih a ni dawn ta a, he inthlanna neih tur atan hian inbuatsaihna engkim peihfel a ni tawh.

Mizoram sawrkar leh HPC (D) ten inremna an ziah anga Sinlung Hills Council din a nih hnuah SHC Interim Period din chu thla li (4) chhung atana an hun pawhsei sak niin hei hi tun thla ni 8 khian a zo dawn a, hei vang hian sawrkar chuan SHC inthlanpui hi a vawikhatna atan buatsaihin he inthlanna neih tur atana campaign theih hun chu Pathianni tlai dar 4:00 khan a tawp tawh a. Tukin dar 7:00 atanga tlai dar 4:00 thlengin mipui ten Vote an thlak dawn a, mipui ten Vote an thlak zawh veleh hian khaw hrang hranga Counting Hall siam ah te Vote tla te hi chhiarin inthlan result puan nghal a ni ang.

He inthlanna neih turah hian Aizawl District-ah Polling Station 31 awmin Kolasib District-ah Polling Station 7 a awm dawn a, a vaiin Polling Station hi 38 a awm dawn a, he inthlanna neih turah hian Vote nei thei mipa 10,509 leh Hmeichhia 10,405, an vaiin 20,914 an awm a, Hmeichhia aiin Mipa vote nei thei hi 104 in an tam zawk a ni.

Sinlung Hills Council-ah hian member 14 awm tura ruahman niin heng zinga 12 te chu mipui thlan tur niin midang pahnih (2) te chu sawrkar aiawha ruat tur an ni thung a, heng member 12 thlan tur atan hian Candidate 42 awmin a tam ber hi Independent Candidate an ni.