Tripura Camp-a awm zingah ril\am vanga thi an awm niin MBDPF hruaitu ten an sawi

Tripura a Naisingpara Relief Camp-ah ril\am luat vangin Bru naute leh nu pakhat kum 60 mi an thi niin Mizoram Bru Displaced People's Forum (MBDPF) hruaitute chuan Inrinni khan an sawi.

MBDPF Vice President R. Laldawngliana'n PTI a hrilh danin Dolendro Chongpreng fapa naute kum 2 mi, John Chongprengh leh Binoda Reang nupui Makoto Reang (kum 60 mi) te chu Ningani khan eitur neih loh avangin ril\amin an thi a. Tunah hian ril\am luat vanga thichhawnga awm Asapara Relief Camp a cheng Ramjoy Reang (kum 65 mi) chu nikhawhre lovin a awm a, Damdawi In-ah enkawl mek a ni, a ti a. Hetianga ril\ama an awm chhan hi Bru laklet hna thawh \an October ni 3 a\anga a thlawna buhfai an dawn \hin leh pawisafai an dawn \hin tihtawp a nih tak vang niin an sawi a. Bru ho hian an thil dawn tihtawp duhloh lantir na'n leh an eitur leh sumfai \anpuina pek chhunzawm leh ngiatin Ningani a\ang khan Dasda leh Anandabazar inkar kawngpui an dang mek a ni.

Tripura Relief Camp-a awm Bru puitling hian ni khatah Rs 2.67 dawngin naupangin Rs 1.33 an dawng \hin a, buhfai hi puitling in ni khat ah gram 450 dawngin naupang in gram 225 an dawng a ni. Laldawngliana chuan ril\am avanga damlote hi Doctor-te'n an ngaihsak lo niin a sawi a, Doctor awmna hnai ber hi Naisingpara a\anga kilometre 3 vela hla Gachirampara niin a sawi bawk a. Kanchanpur SDM leh SDPO te chu Doctor-te khuahkhirhah a puh a ni. Kanchanpur SDM Abhedananda Baidya chuan Naisingpara a mi pahnih an thih thu hi a dawng tih an sawi a, an thih chhan hi chhui chian mek a nih thu a sawi a, Bru hruaitute'n an puhna chungchang erawh a sawi zui duh lothung.

Hetihlai hian October ni 3 a\anga Tripura Relief Camp-a awm te hruakir hna thawh mekah hian Inrinni thleng khan Bru chhungkaw 216 chu Mizoram-ah an lokir tawh a, an zinga tam tak hi anmahni thu a lokir an ni a. Bru ho hian hruaikir hna thawh hi dodalin Official-te pawh lo dang \hin mahse sawrkar chuan ruahman lawk angin November ni 30 thleng kalpui a tum a. Tun \um hi sawrkar buaipui a hruaikir thawh 9-na a ni a, a tawp ber tur a nih tawh thu Ministry of Home Affairs hotute chuan an sawi a ni.