Home Minister hnenah ILP chungchanga harsatna thleng leh ramri chungchang thlen a ni

MZP General Hqrs. hruaitute leh JAC on Inner Line Reserve Forest hruaitu te chuan Home Minister, Lalchamliana chu Mizoram leh Assam ramri chungchang leh Tripura leh Assam-a Zohnahthlak ten Vairengte Check-Gate a harsatna an tawh chungchang te an sawipui.

Zirtawpni tlai-a a chenna In-a Home Minister an inkawmna ah hian MZP hruaitute leh JAC on Inner Line Reserved Forest hruaitute chuan Vairengte checkgate a Zohnahthlak unau ten ILP chungchanga harsatna an neih thu te, kan unau Hrangkhawl hnam, Aizawl lo kal tur Vairengte Police in ILP an lo dil leh an nihna an sawi chung pawha an hriatthiam duh loh thute leh an haw tir leh thu te, Mizoram sawrkar leh MZP ngei pawhin khawvel hmun hrang hranga Zofate inpumkhat a kan awm a, kan insuihkhawm theih nan nasa taka hma a lak lai a, inpumkhatna tichhe thei thil hetiang ang kan unaute chunga a thlen leh \hin thu te sawi a. Hemi chungchang hi enfiah sak tur leh hetiang a thlen tawh loh nana hma laksak turin an ngen a. Home Minister chuan a\ul anga lo enzui a tum thu leh ILP hi kan unaute danna tura siam a nih loh thu leh, min chimral theitu hnamdang dan anga an lo luh a, dan lova an lo lut tur venna tur a nih thu a lo sawi a ni.

Hei bakah hian MZP hruaitute leh JAC on Inner Line Reserve Forest hruaitute Zophai hmun a Muslim ten Biak In Mizoram sawrkar in sa lo tura a ti chung pawha an sak luih thu te, Govt. of India a\anga Mizoram leh Assam ramri chungchang a Mizoram sawrkar hnena urgent lehkha, nikum 2018 kumtawp lama hmuh tawh tun thleng a Mizoram sawrkar in a la hup tlat chu an hriatthiam loh thu pawh an thlen a. Home Minsiter chuan an thu thlen chu official lam a lo sawipui tur thu leh sawrkar in Mizoram leh Assam ramri buai chungchangah hian theihtawp chhuah a hma a lak tur thu a lo sawi a, Govt. of India a\anga lehkha lo kal pawh a\ul anga a lo enzui nghal tur thu a sawi.

MZP hruaitute leh JAC on Inner Line Reserve Forest hruaitute chuan Mizoram leh Assam ramri buai chinfel a nih theih nan Mizoram sawrkar chu chak taka hma la turin a ngen nawn leh a, MZP in Zofate Chawlhbuk a sak pawh nikhat em pawh a din hma in Assam Police leh Assam Forest department ten an \hiahsak nghal theih lai leh Zofate Chawlhbuk sak \hat leh tuma kal MZP member te Assam Police in Silai hial a an lo kah darh lai a Forest area chhunga mi tho Assam lam mi ten Biak In \ha tak an sa thei chu hriatthiam har an tih thu an sawi a. Forest area hi a khawi lam mah mah khawih theih loh tura tih a nih laiin Assam lam hian School te an sa a, Thingpui huan te, Lakhuihthei huan te siamin, Teak te an phun nasa hle niin an sawi. Zophai hmun a Assam lam miin Biak In an sak hi \hiahsak ve nghal tura Mizoram sawrkar an phut tlat thu sawiin, Mizoram Sawrkar in Muslim Biak In hi a \hiahsak ve nghal loh chuan Zofate Chawlhbuk sa turin Mizo \halaite an inbuatsaih ve nghal dawn tih an sawi bawk.