Synod Social Front bultuma Serchhip-a Plumbing Training zawhfel a ni

Mizoram Presbyterian Kohhran, Synod Social Front buatsaiha October ni 21, 2019 a\anga Serchhip District tana Plumbing Training neih chu nimin khan khan zofelin a kharna hun hman a ni a. Training chhuak te hnenah Certificate hlan nghal an ni.

Serchhip Kawnpui Kohhran Diamond Jubilee Hall-a he training kharna nimin a neih hi Serchhip Pastor Bial vawngtu, Pastor H. Lalawmpuia chuan kaihhruaiin Mizoram Synod chuan Thlarau lama rawngbawlna bakah tisa lama kan mamawh, kan damkhawchhuahna tura \ul ah te Synod Social Front kaltlanga hma a lak \hin thu sawiin, heng hmalakna hi Kohhran tih tur dik tak a nih thu a sawi a. Thlarau mi ni tur chuan tisa lamah pawh kan intodelh a \ul thu leh Pathian tana mi \angkai ni tur chuan intodelh a \ul thu a sawi a. Mahni thawhrah kan hmuh chu Pathian malsawmna a nih thu sawiin, he training a tel te chu eizawnna atana an thil zir te an hman hunah Kohhran hnuaia zirchhuak an ni tih hre renga lanchhuah tir tura chahin, rinawmna ah hlawhtlinna a awm tih hre reng turin a chah bawk.

He huna hian Synod Social Front Coordinator, Lalnuntluanga pawhin Synod Social Front hmalakna leh kalphung te sawiin, Kristian ten tihtur hrang hrang an neih ah hlamchhiah bik neih a rem loh thu leh ei bar zawnna kawngah Kohhran mite an lo intodelh theih nan hetiang hun hi buatsaih a nih thu a sawi a. Tunlai khawvel changkang zelah Plumbing chu eizawnna tling a nih thu sawiin, taimakna leh rinawmna nen hna thawka anmahni ruaitute thu ngaichang thiam turin training-a tel te chu a chah a. Midangte nena inel reng an ni tih hriaa an training chhunga an zir bak pawh anmahni ngaihtuahna a\anga zirchhuah zel tum turin a chah bawk.

Serchhip Kawnpui Kohhran-a Synod Social Front Chairman leh Training Director ni bawk, Upa R. Laldaihzauva chuan he hunah hian training Report pein tun \um hi Serchhip khua ah hetiang training buatsaih a nih \umkhatna a nih thu sawiin, he training-ah hian Serchhip Town chhung bakah District chhung khaw 9 a\angin mi 20 an tel thu a sawi a. He training a tel te hi PHE Department in an zirtir thu leh anni lam pawhin an lo phurpui thu sawiin, an hmanraw hrang hrangte an rawn thawhchhuahpui thu a sawi a. Plumbing training bakah hian Synod Social Front in thildang zirna a buatsaih \hin te pawh Serchhip-ah rawn buatsaih zel se an duh thu Synod Social Front Coordinator hnenah hian a thlen nghal bawk a ni.

Nimin a he Training kharna hunah hian Trainers leh Trainee te a\angin thusawi ngaihthlak a nih bakah Rev. R. Ramnghinglova, Councillor, Family Guidance & Counselling Centre Serchhip pawh thu sawiin, he Training-a te hnenah hian Certficate a hlan nghal bawk a ni.