Police ten Student Police Cadet te zirtir

Serchhip District Police te chuan nimin khan Serchhip-a Student Police Cadet te tan thil pawimawh hrang hrang zirhona an buatsaih.

Serchhip District Police te hian Marian H/S-ah Student Police Cadet hi dinin thil pawimawh hrang hrangte an zirtir \hin angin nimin khan heng thil pawimawh zirhona hi an buatsaih leh a, he hun hi Serchhip SDPO, Viktor Zothansanga chuan hmanpuiin hun hmasa lamah Jessie Zaithanmawia ASI, Serchhip P/S chuan chhiatrupna (disaster) a thlen huna hliam te enkawlna tura First Aid pek dan tur zirtirin hemi hnu hian zirlai te hian a tak angin an enchhin nghal a. Hun hnihna ah Drill zirna hun neih leh niin he hunah hian H. Ramfangzauva, SI, Post Commander, 3rd Bn.MAP leh Zirsanga Havilder, 3rd Bn.MAP te kaihhruaina hnuaiah Student Police Cadet te hian Drill Parade an zir leh a, Discipline leh team work zir nana drill pawimawhzia te hrilh an ni bawk.

Student Police Cadet hi zirlai naupangte'n an zirlai tibahlah lova an zirlai mai bakah eng kawngah pawh mi hmantlak ni tura chherchhuah chu a tum ber a ni a. Nimin a he zirhona hun hi Student Police Cadet-a Police Liaison Officer leh Serchhip Police Station OC, Inspr. VL. Ramhluna bakah Lalpianmawia, Community Police Officer leh Agnes Zirsangpuii, Assistant Community Police Officer te pawhin telpuiin activity dang pawh buatsaih zel tum a ni bawk.