SHC-a thlantlin te lalut ta

Sinlung Hills Council (SHC) inthlan hmasa ber neih zawh taka thlantlin thar mi 12 te chu nimin khan Aizawl DC Pisa-ah rinawmna thu tiam tira lakluh an ni a, SHC Chief Executive Member (CEM) atan hian Lalthlamuana Hmar chu thlan a ni bawk.
SHC inthlanna neih zawh taka thlantlin te lakluh inkhawm DC Pisa-a neih hi SHC Secretary, VL. Hruaizela Khiangte-in a kaihruai a, Aizawl DC Vanlalngaihsaka'n Protem Chairman atan HC. Lalmalsawma chu rinawmna thu tiam tirin a lalut a, hemi hnu hian Protem Chairman HC. Lalmalsawma chuan SHC inthlannaa thlantlin thar mi 12 te chu rinawmna thu tiam tirin a la lut ve leh a ni.
Hemi hnu hian Protem Chairman, HC. Lalmalsawma kaihhruaina hnuaiah Chairman leh Deputy Chairman tur thlanna neih zui niin, Protem Chairman ruahmanna angin Member ten Chairman atana thlan tur an rawt chhuak a, rawt chhuah awmchhun Lalmalsawma Darngawn chu Chairman atan tlinga puan a ni a, Deputy Chairman tur pawh member ten an rawt leh a, Lalvenhima Hmar hi rawt chhuah awmchhun niin, chuhtu awm lovin tlingah puan a ni.
SHC Chairman ni ta, Lalmalsawma Dar-ngawn kaihhruaina hnuaiah Chief Executive Member tur thlanna neih leh a ni a, member ten an rawt awmchhun Lalthlamuana Hmar chu CEM atan tling ah puan a ni a. CEM thar hian Executive Member mi 3 leh Nominated Executive Member mi 1, an vaiin mi 4 a ruat leh  nghal a, Executive Member atana ruat te chu Ratu bialtu H. Lalengzauva, New Vekvek bialtu Lalnun-tluanga leh Vanbawng bialtu, Ricky Zoremsanga te an ni a, Nominated Member-ah Melody Lal-chhuangzeli ruat a ni. CEM thar chuan Executive Member tur chu mi pali tur ni mahse mi 3 ruat phawt an nih thu leh Nominted Executive Member tur pawh mi 2 ruat tur ni mahse mi pakhat chauh ruat rih a nih thu sawiin, hun reilote hnuah hmun awl te luah tur hi tih fel vat a nih tur thu a sawi.

Comments

Chhiar Hlawhte