Central YMA hruaitute leh MJA General Hqrs. hruaitu ten Aizawl-ah inkawmna an nei

Central YMA hruaitute sawmna angin nimin, November 8, 2019 khan Mizoram Journalists' Association (MJA) General Hqrs. hruaitute leh Central YMA hruaitute chu Central YMA President Room, Tuikhuahtlang Aizawl-ah an inkawm a, inhmelhriatna neih pahin hmalakna atana pawimawh te an sawi khawm.

He inkawmkhawmna kaihruaitu Central YMA President, Vanlalruata chuan Central YMA hruaitu chu inthlang thar hlim hlawt an nih angin inhmelhriatna leh thawhho zelna atan inkawmkhawm hi huaihawt an ni tih a sawi a. YMA chu a huap a zau a, chhangchhiat chang te a awm thin thu leh thu har deuh neih chang pawh a awm thin tih sawiin, heng hunahte chanchinbumi, MJA-ten an tawiawm thinna ah lawmthu a sawi a. YMA chu ram leh hnam tan pawl pawimawh tak a nih rualin, a hruaitute chu mi fing leh fel ber ber an nih loh avangin finchhuah an mamawh tih pawh sawiin, MJA nen pawh inkawm ho zeuh zeuh an duh tih a sawi bawk.

He hunah hian MJA President, Zonunsanga Khiangte pawhin YMA-in hun rei tak chhung Kumpuan atana a lo neih tawh, Ram leh Hnam humhalh chu hlamchhiah a la ni lo chungin, Kumpuan thar, 'Zirna Uar' a puang ta chu MJA te an lawm hle tih a sawi a. All India Service leh Central Service-ah Mizote kan lang ve mang ta lo chu rualawh a nat thu leh, zirna uar hi beihpui thlak a ngai hle tih a sawi a. Mizo thalaite nunpung veiawm, Phone leh Social Media in a tibuai ta lutuk leh lehkha chhiar kan hlamchhiah ta lutuk chu MJA pawhin veiawm a tih zia te sawiin, Zirna Uar Kumpuan chuan lehkha chhiar tam tura inzirtir hi keng tel se, YMA hmalakna ah pawh tel se a duhawm tih a sawi. Tunlai thalaite hriatzauna lama kan ril lo em em mai chu YMA-in theihtawp chhuah se heti lama rual kan el chhoh leh theih a beiseiawm hle tih a sawi bawk a. Heng hmalakna ah hian chanchinbumite an tangkai ve theihna a awm chuan theihtawp chhuah an inhuam thu te, zirna uar hmalakna ah mipui hnena puanzar tur awmte chu MJA pawhin a tih turah a ngaih thu a sawi a. Zirna ngawr ngawr piahlamah Aia upa zah leh nundan mawi hrim hrim inhrilhhriat te chu YMA kumpuan hian a keng tel turah an ngaih thu a sawi bawk.

Nimin a heng pawl pahnih hruaitute inkawmkhawmna ah hian Central YMA lam atangin an Office Bearers an kim a, MJA lam ah hian Executive Member chin an tel bawk a, he hunah hian Zohnahthlak inpumkhatna chungchang te, Chakma leh Bru chungchang leh thu pawimawh dangte sawi ho niin, hmalaknaa sawifiah ngaite an inhrilhfiah a ni bawk.