MHIP General Hqrs. leh Sub-Hqrs. OB thukhawm

MHIP General Hqrs. Office Bearers leh MHIP Sub-Hqrs. Office Bearers te chuan nimin khan Joint Meeting neiin MHIP buaina chungchang an sawiho.

Aizawl-a MHIP General Hqrs. Office-a MHIP General Hqrs. leh Sub-Hqrs. Office Bearers te Joint Meeting hi MHIP General Hqrs. President, Lalthlamuani chuan kaihruaiin he Joint Meeting hian MHIP Gen. Hqrs. OB nilai te chu Gauhati High Court in inthlang tura a tih anga Central YMA kaihhruaina hnuaiah inthlanna felfai taka neih ah MHIP General Hqrs. hruaitu tur atana member ten an duh taka an thlan an nih avangin chak takin hma la chhunzawm zel se, an kaihhruaina hnuaia awm chu thlamuan thlak an tih thu leh MHIP Sub-Hqrs. hruaitute chuan theihtawp chhuahin an thlawp zel ang tih an sawi a. MHIP General Hqrs. atanga lehkhathawn chhuah nilo chu MHIP member ten engahmah lo ngai lo turin an in hriattir bakah MHIP General Hqrs. atanga thuchhuakte lo ngaichang a, lo ngai pawimawh turin an in ngen nghal bawk.

Hetihlai hian kumin April thlaa MHIP General Hqrs. hruaitu thlanna neih tura Nomination Paper tih chingpen chungchanga FIR thehluh ah Police chhuina atangin mi panga (5) te chu chargesheet an ni tawh nia thudawn a ni a. Kumin April thlaa MHIP General Hqrs. hruaitu thlanna neih dawn tuma Nomination Paper tih chingpen duhlo tu te Adhoc Body chu nimin khan Dawrpui Multipurpose Committee Hall, Aizawl-ah thukhawmin MHIP General Election-a Nomination Paper ti chingpena puhte laka Chargsheet, tun thla ni 4-a chhuak chu an thlirho a. Heng chargesheet pek te hi Lalthlamuani, Biaksailovi (Saipuii), Lalbiakengi, Lalengkimi leh Lalhmangaihzuali te an ni tih an sawi.

He thutkhawm a tel te hian MHIP General Hqrs. hruaitu thlanna April ni 17, 2019-a neihna tur atan Nomination Ballot Paper hmanga siam chu April ni 8, 2019 khan khar a ni tih sawiin, amaherawh chu Ballot Paper te hi April ni 13, 2019-ah chauh chhiar a ni tih sawiin, inthlanpui tura sawm, MSU hruaitu ten Ballot Box an hawn hian Ballot Paper pawhbun tam tak hmuin, Form awmsa a fill-up chawp Ballot Paper rinhlelhawm an hmu teuh bawk tih an sawi a. Heng te hi chhiar tel lovin Hqrs. Nomination nen MSU hruaitute chuan Hqrs. atanga mi sawm (10) leh Ballot Box atanga mi 10 te Nomination a tlingte chu a puang ta tih an sawi bawk.

Amaherawh chu tling tura ngaih tling talo te an awm avangin mi thenkhatin MSU President hnenah Ballot Paper te RTI Dan hmang an en an dil thu leh an en hnuah thil diklo tam tak an hmu nia sawiin, hei vang hian Rohmingliani hminga FIR thehluh a nih thu leh Police chhuina kal zel atangin mi panga (5) chu chargesheet an ni ta tih an sawi a ni.