Serchhip leh Keitum inkarah Methamphetamine cheng vbc. 36 chuang hu man a ni

Serchhip Darnam Branch YMA leh Excise & Narcotics Department tangkawp chuan nizan hmasa khan Serchhip leh Keitum inkar, Chuanhnuai-ah Methamphetamine cheng vbc. 36 hu vel zet manin he thila inhnamhnawih nia hriat mi pahnih pawh man nghal an ni bawk.

Thudawn danin Serchhip Darnam Branch YMA leh Serchhip-a Excise & Narcotics Department te hian nizan hmasa khan Serchhip khawpui chhunga Motor lut tur enfiah hna thawkin nizan hmasa dar 12:30 vel khan Serchhip leh Keitum inkara-ah Auto Rickshaw pakhat atangin heng damdawi, Methamphetamine nia hriat te hi an man a, heng damdawi te rawn kengtu nia hriat Sabul Uddin (38) S/o Aiab Ali, tuna Serchhip Chanmari Veng-a khawsa mek nia inchhal chu man nghal a ni a. Sabul Uddin hian niminpiah tlai khan Salim Uddin (38), S/o Sam Uddin, Serchhip Hmar Veng-a khawsa mek in Hnahthial atanga Auto Rickshaw-a thil la tura a tirh anga kal an nih thu leh an thil lak chu sawrkar phalloh leh damdawi a ni tih a hriatloh thu an sawi a, he a thusawi bawhzui hian Salim Uddin hi a chenna In atangin Excise & Narcotics Department hian an man nghal bawk a, thubuai siam sak niin nimin khan Medical Check-up neih a nih hnuah Serchhip District Court-ah thawn nghal an ni bawk.

Thudawn danin heng damdawi an man te hi mum 1,80,000 vel niin a vai hian Kg. 21.523 a rit a ni a, Box 18-a awm niin pocket 9-ah dah a ni a, heng damdawi hi mum khat Rs. 200/- hisap vela hralh thin nia thudawn niin hemi anga chhut hian a vaiin cheng vbc. 36 hu vela chhut a ni a. He damdawi lakna a kal Sabul Uddin hian heng damdawi te hi Hnahthial dai-ah midang kut atanga an lak a nih thu sawiin, khawia kalpui zel tur nge tih pawh a hriatloh thu leh amah hi Rs. 1000/- hlawha va kal ve chauh a nih thu a sawi a, amah tirtu nia a sawi, Salim Uddin erawh chuan Sabul Uddin hi a tirh loh thu sawiin, he thil-ah hian inhnamhnawihna a neih loh thu leh engmah hriat a neih ve loh thu a sawi thung a ni. He damdawi an man ruala man, Sabul Uddin hi Cooker chhe siama hun rei tak Serchhip-a lo khawsa tawh niin tunah hian ILP a neilo nia thudawn a ni a, amah tirtu a sawi Salim Uddin hi chuan Cement Mistiri a nih thu leh ILP a neih thu sawiin, Serchhip Bazar Hnuai ami in a sponsor thu a sawi a, a ILP sponsor tu erawh a hming a hriat loh thu a sawi thung a ni.