Serchhip-ah Bialtu MLA hovin Children's Day pualin Carnival neih a ni

Nimin November 14, 2019 kha India Prime Minister hmasa ber, Pandit Jawaharlal Nehru pianchampha vawi 130-na a ni a, he Ni hi Naupangte Ni atan hman niin rampumahy urhsun taka hman a ni a. Serchhip-ah pawh bialtu MLA, Lalduhoma hovin Children's Day hi hman a ni.

Serchhip Sports Complex-a Children's Day hman hi bialtu MLA, Lalduhoma chuan hmanpuiin he huna kal te chu chibai a buk a, November ni 14 chu India Prime Minister hmasa ber, Pandit Jawaharlal Nehru-a pianchamphaphak a nih thu leh Pu Nehru-a kha naupangte ngaina tak a nih avangin he ni hi Children's Day-ah hman a nih thu a sawi a. Kumin hian Serchhip District-ah Children's Week kan hmang tha hle nia a hriat thu sawiin, Naupangte tana HIV/AIDS chungchang bakah damdawi hmansual chungchang inzirtirna neih a ni te, nu leh pa te tana naupangte hmalam hun atana inzirtirna neih a ni te leh tuna Carnival neih a ni te chu lawmawm a tih thu a sawi. 
Naupangte chu Pangpar kuhmum ang an nih thu sawiin bialtu MLA chuan, “Mawi taka an par chhuah theihna turin duat tak leh dimdawi taka enkawl hi puitling tawhte zawng zawng mawhphurhna a ni. Pangpar te hian rawng leh rim pianpui an nei theuh a. Pangpar rawng vara par thin chu a sen-a par tir talh tum tur a ni lova. Chutiang bawkin naupangte hian tuina lam leh chemkalna lam pianpui, khuanu duan sak an nei theuh a. An pianpui talent mil-a par chhuahtir hi a pawimawh em em a ni,” tiin Nu leh pa ten nihtir tum neih tlat chu a fuh berlo tih a sawi bawk.
Hei bakah hian bialtu MLA, Lalduhoma chuan Zu ngawlvei fa te an khawngaihthlak thu sawiin, Pa ber si fa ten Sakei hlauha an hlauh, an leng lo haw hun khur chunga an lo nghah thin kan Society-ah an awm nual thu sawiin, “Heng naupangte hi kan chhan tur a ni a, chu chu sawrkar, Kohhran leh NGO-ten kan bat ah i ngai ang,” a ti a. Eizawnna bawlhhlawh, Zu zawrhna hmun ang-ah te pawh naupang chhawr te an awm bawk thin thu a sawi a. He huna kalkhawm naupangte chu mi aia ropui leh chungnung bik an ni vek dawn lo tih sawiin, amaherawh chu mi pangngai nih tum turin a chah a. Mi pangngai nih chu thil har reng renglo tih sawiin, “Mi mut rualin mu ula, mi thawh hunah tho ula, chaw ei hun pangngaiah chaw ei ula, mi inkhawm rualin inkhawm ula, mi pangngai in an tih ang apiang ti ve ula, ruihtheih thil lakah fihlim ula, tichuan, mi pangngai in ni mai,” a ti bawk.
Kumin a Children's Week puala Serchhip a hun hman hi District Child Protection Unit (DCPU), District Legal Services Authority leh Project Himna-Serchhip Against Drugs, Alcohol & Tobacco (SADAT) te buatsaih niin nimin a hun hman hi District Child Protection Officer, Lalsiampuii chuan kaihruaiin Lok Adalat Member, Laldinpuia chuan inlawmna thu a sawi a. Child-ren's Week hman puala naupangte tana Art & Craft Competition buatsaih leh Open Photography Competition buatsaiha lawmman te khual-lian hian a sem nghal a, hemi hnu hian naupangte tan intihhlimna chi hrang hrang chu tlai dar 3:00 thlengin buatsaih zui a ni bawk.

Box :
Art & Craft Competition result :
High School :
1. Judy Lalruatfeli, Govt. JM H/S Serchhip
2. Lalawmpuia, Marian H/S Serchhip
3. Vanlalhruaii, Govt. JM H/S Serchhip
Middle School :
1. Lalremruati Pachuau, PES, Serchhip
2. Lalthlamuanpuii,CMES, Serchhip
3. J. Lalmawizuali, Govt. Model M/S
Primary School :
1. Vanrempuia, PES, Serchhip
2. Ramherliana, CMES, Serchhip
3. Vanlalhluzuala, PES, Serchhip
Heng bakah hian a tel zawng zawng te pawh lawmman pek vek an ni.

Comments

Chhiar Hlawhte