Latest News

Serchhip District-a Thla ruk chhunga Zu man thubuai chinfel tawh tihchhiat a ni

Kumin May thla atanga October thla thlenga Serchhip District chhunga Zu man, Serchhip District Court in an thubuai a chinfel tawh te chu nimin tlai khan Serchhip-ah tihchhiat a ni.
Serchhip District Court Complex-a heng Zu tihchhiatna puala inkhawm tawi neih ah Serchhip District Court-a Chief Judicial Magistrate, Ngursangzuali Sailo chuan Zu leh ruihhlo te chuan mimal nun a tihchhiat thin thu sawiin, mimal nun chhia chuan chhungkua tichhiain khawtlang chhiatna a thleng thin tih a sawi a, Mizoram-ah Zu leh ruihtheih thil avanga kum 30-40 inkar thi an tam zia sawiin, sawrkar in Zu leh ruihhlo manchhuak tura a rawih, Excise & Narcotics Department leh Police-a thawk te bakah tlawmngai pawl te hnathawh chu ropui a tih thu a sawi a. Mimal kan dam chuan chhungkua damin khawtlang a dam tih sawiin, hei vang hian Zu leh ruihtheih thil tih loh a pawimawh thu a sawi a. Sawrkar in Zu leh ruihtheih thil dang a man te chu duh dan dana tihral theih a nih loh thu sawiin, damdawi (Heroine leh a dangte) phei chu sawrkar in a tiral tura a ruat Committee ten ruahmanna an siam ang chauha tihral theih a nih thu a sawi bawk.
Heng Zu tihchhiatna hunah hian Serchhip Sub-Hqrs.YMA President, R. Sanghmingthanga chuan hetianga zat a tam tum khata Zu tihchhiat hi Serchhip-ah ala awm ngailoh thu sawiin, hetianga thalaite nun tichhetu Zu manchhuah hna thawktute chungah lawmthu a sawi a. Sawrkar in Zu leh ruihhlo man leh dapchhuah hna thawk tura a rawih te chu YMA ten theihtawp chhuaha an tawiawm zel dawn thu a sawi bawk.
Nimin-a Serchhip District Court in a tihral Zu te hi kumin May thla atanga October, thla 6 chhunga man niin thubuai 27 ami niin heng zinga 25 te hi a neitu hriat leh man an ni a, te niin Rakzu litre 460.6, BEDC litre 1194, rampawn atanga lakluh Cane Beer Diablo 720 leh Dagon 144 te a ni a. Hemi hun chhunga Police leh Excise & Narcotics Department ten Sapzu, Indian-Made Foreign Liquor (IMFL) te erawh Court hian sawrkar Chhiah hmuhna turin Excise & Narcotics Department kutah hlanin, Chhiah chu sawrkar-ah an chhunglut ve leh thung dawn nia thudawn a ni.

Comments

Popular News (Last 30 Days)