Serchhip District Bawrhsap in ni 2 awh Registrar of Births and Deaths Annual Training a hmanpui

Serchhip District chhunga Registrar of Births and Deaths te tana ni 2 awh Annual Training chu nimin khan Serchhip-ah zawhfel niin Serchhip District Bawrhsap, Sangchhin Chinzah chuan hmanpuiin, Registrar of Births and Deaths te chu an hnathawh pawimawh zia hre reng turin a chah.

Serchhip DRO Conference Hall-a he Training-ah hian District Bawrhsap leh District Registrar, Sangchhin Chinzah chuan District chhunga Registrar of Births and Deaths te chu sawrkar hnathawk an nih thu sawiin, sawrkar hnathawk te chu eng hna pawh thawktu ni mah se an theihtawp an chhuah a ngai tih sawiin, chutianga an thawh chuan hna tha thawk an nih thu a sawi a. Sawrkar hnathawk te tana Training neih thin chu a hlawkthlak thin tih sawiin, hei vang hian training chhunga an thil zir te ngaihthla liam mai lova, an hriatchian loh te pawh zawtchiang thin tur leh training chu hlawk taka hman tum turin he huna tel te chu a chah a. Registrar of Births and Deaths te hnathawh chu a pawimawh thu sawiin, rampum huap a ni emaw, State, District, leh chhungkua pawh nise hmasawn tura ruahmanna siam turin Data leh Statistic mumal tak neih a tul thu sawiin, chumi atana thawktu pawimawh tak an ni tih hre reng tura chahin, an hnathawh chu ngai hniam lova a pawimawh zia hre reng turin a chah bawk.
Serchhip District Research Officer, Manliana kaihhruai he hunah hian Economic and Statistic Department-a Director, Lalrikhuma Sailo chuan India rama piang leh thi chhin-chhiahna turin Registration of Births and Deaths Act, 1969 chu siam a nih thu leh chumi hnuah Rules te siamin, Mizoram-ah pawh kum 1978-ah Rules siam a nih thu a sawi a, amaherawh chu July 1, 1985-ah he Dan hi Mizoram-ah chuan a taka hmanga Registration tih ve chauh a nih thu sawiin, hemi hnu hian kum 2007 leh 2015-ah he Rules hi siam-that a nih tawh thu leh tunah hian 2015-a siamthat chu hman mek a nih thu a sawi.
Economic and Statistic Director chuan he Dan hnuaiah hian India rama piang leh thi te chu chhinchhiah vek tur a nih thu leh ramdang mi, India rama rawn zin-a piang te pawh chhin-chhiah vek tur a nih thu a sawi a. Amaherawh chu sawrkar in Births Certificate leh Deaths Certificate te chu document pawimawh ah a hman avangin fimkhur a tul thu a sawi a. Tunhnai ah hetiang Certificate lem siam hi Mizoram hmun thenkhat ah man an awm zeuh zeuh thu leh Serchhip District chhungah man an la awmloh thu a sawi a. Hetiang thil diklo ti thin te veng tura theihtawp chhuah turin District chhunga RBD te chu a sawm a. India rama State te zingah piang leh thi zaa za chhinchhiah vek chu tlemte chauh an awm thu leh heng zingah hian Mizo-ram chu a tel thu pawh sawiin, hei hi RBD te thawh that vang anih thu a sawi bawk.
Tun dinhmunah Serchhip District chhunga khaw hrang hrangah Registrar of Births and Deaths hi mi 46 an awm mek a, heng te hi khaw hrang hrang ami te bakah damdawi In a thawk te an ni a. Niminpiuah a Training ni hmasa zawkah kum kalta chhunga an hnathawh hrang hrangte thlirletna neiin kumthar atana an hman-raw mamawh turte semchhuah an ni bawk.
Nimin-a he training neih chhunzawm ah hian K. Zodinpuia, DPA bakah Directorate of Economic and Statistic atanga mithiam rawn kal ten zirtirna pein zawhna leh chhanna hun hman a ni bawk.
India rama Census kalpui ah hian a lu ber chu Ministry of Home Affairs hnuaia Registrar General of India/Commissioner niin, State Level-ah chuan Economics & Statistics chu Nodal Department te niin a lu berah Chief Registrar/Secretary, Planning Department an ni a. District tinah District Registrar/Deputy Commissioner chu a lu ber niin a hnuaia a taka enkawltute chu Asst. District Registrar/District Research Officer, Economics & Statistics Department te an ni.

Comments

Chhiar Hlawhte