National Highway-54, Aizawl-Tuipang via Lunglei chu NHIDCL kutah hlan fel a ni ta

Mizoram chhunga kawngpui pawimawh tak, National Highway-54 a kawngpui engemaw zat chu Mizoram State PWD chuan National Highways & Infrastructure Development Corporation Limited (NHIDCL) enkawl turin an hlan.
India rama National Highway neitu, Ministry of Road Transport & Highways (MORT&H) ruahmanna angin, NH-54 thenkhat, Zembawk dai atanga Tuipang thlengin, National Highways & Infrastructure Development Corporation Limited (NHIDCL) enkawl turin November 1, 2019 khan State PWD chuan hlanin hemi ni atang hian he kawng chungchang hi State PWD mawhphurhna a ni ta lo tih sawrkar thuchhuah chuan a tarlang a. NH-54, Aizawl-Lunglei hi hun engemaw chen Border Roads Organisation (BRO) in an enkawl hnuah BRO atanga State PWD-a pek turin MoRT&H chuan 6.5.2008 khan thupek siamin, a bak Silchar -Aizawl tan 26.9.2008 khan thupek dang a chhuah leh a; engemaw harsatna avangin April, 2010 khan BRO chuan State PWD kutah a hlan ta chauh a. PWD-in kum 9 a enkawl hnuah tunah hian kawng thlur hnih (double lane) a sial turin NHIDCL kutah hlan a ni leh ta a. An ni hian Contract hna 8-ah thenin contractor 8-in an thawk dawn a. Japan International Co-operative Agency(JICA) atanga loan hmangin an thawk dawn a ni.
National Highways & Infrastructure Development Corporation Limited (NHIDCL) hi National Highway Authority of India (NHAI) ang bawk a India Sawrkar laipui ta niin, NE State zawng bakah Jammu & Kashmir leh Himachal Pradesh-a National Highway te chu State PWD nen an in enkawl sem dawn a. Anni hi BJP Sawrkar hmasak a din thar, MORT&H te, BRO leh State PWD atanga thawktu lakkhawm an ni.
Mizoram enkawltu NHAI General Manager chu SIRD Building, Durtlang-ah awmin, Project Manager Office chu Serchhip, Lunglei leh Lawngtlai-ah dah an ni bawk a. Anmahni dawr duh chuan heng hmun ah te hian dawr theih an ni ang. Mizoram tana lamlian pawimawh sial tur an nih avangin, harsatna siam zawng ni lova, hna chak leh tha taka a kal theih nana NHIDCL leh an Contractor-te lo tawiawm turin PWD chuan mipuite a ngen a ni.

Comments

Chhiar Hlawhte