Dy. Speaker in Volleyball Tournament a hawng

Assembly Deputy Speaker leh Tuikum bialtu MLA, Er. Lalrinawma chuan nimin khan Chhing-chhip Mualpui-ah ‘Pu Lalpianthanga Memorial Volleyball Tournament’ a hawng.

Mualpui Volleyball Court-a he Tournament hawnna hunah hian Assembly Deputy Speaker chuan infiamna a hmuhnawm lai ber chu theihtawp chhuaha an bei lai a nih thu sawiin, hetianga bei te chu Pathian pawhin mal a sawm thin thu a sawi a. Mizote chu keimahni leh keimahni kan inngaihsana kan inhlut a tul tih pawh sawiin, “Hmanlai Mizote chu hnam inngaihlu tak an ni a, ni leh thla kara leng in ti ngat niin mahni ke-a ding, midangte khaichhuah ngaia awm duh lo an ni. Nula leh tlangvalte pawh taimak, tlawmngaih leh huaisena inel thin an ni. Tlangvalte chuan ral raih inhuamin khawtlang tana thawk thin an ni a. Chutiang a nih laiin tunhma a zirlaibua kan inzirtir thin te avangin mahni in ngaisang lova mingo kan ngaisang ta mai te, mahni hnam thing sawi nana 'Zo tiah tiah' tih kan uar te hi a pawi takzet a ni. Hmanlai-a Mizote nundan phung tha te kha kan neih thar leh a tul hle a ni,” a ti bawk.

Nimin a neih tan Pu Lalpianthanga Memorial Volleyball Tournament hi Nov. 9, 2019 thleng neih tura ruahman niin Tuikum Constituency chhunga Mipa Volleyball Team 15 an inel dawn a ni.