Mipui tam zawk rilru ah 'Bank sum puk hi rulh that a ngai' tih hi a in tuh tawh - Cooperation Minister

Cooperation Minister, C. Lalrinsanga chuan nimin khan Aizawl |huampui-ah Mizoram Cooperative Apex Bank (MCAB) Branch 20-na tur a hawng a. Tunah chuan mipui tam zawk rilru ah 'Bank sum puk hi rulh that a ngai' tih hi a in tuh tawh nia sawiin, lawmawm a tih thu a sawi.

AMC Building Ground Floor-a MCAB Branch thar hawnna ah hian Cooperation Minister chuan kum 15 kalta a MCAB dinhmun ngaituahin tuna an dinhmun chu a tha tawh hle tih a sawi a. Tunhnaia District thar khawpui – Khawzawl leh Hnahthial-ah te Branch an hawng leh Saitual bul Keifang-ah pawh Branch an hawn tum leh chu lawmawm a tih thu sawiin, Co-operative Movement hmangin ram leh hnam chawikan a, an dinhmun siamthat a nih theih dan te a sawi a, Co-operative Society te kaldan erawh enchian a, State Level Society te hian an enpui leh an kaihruai a tul niin a sawi.
Cooperation Minister chuan Bank atanga sum puk rul thalo leh Non-Performing Assets chungchang sawilangin hengte hi Bank tan chuan ngaihven reng a tul thu sawiin, heti chungin tunah chuan mipui tam zawk rilru ah Bank sum puk hi rulh that a ngai tih hi a in tuh tawh thu leh hei hi lawmawm a tih thu a sawi a. MCAB chu Credit Society anih angin Cooperative Movement than zelna atan leh Society te hmasawnna atan ding ni mah se fimkhur taka kal a tul thu a sawi a. Kut hnathawktute hmasawnna leh Bank than zelna in inzawmna an neih dan te sawiin, “Lonei mite kutah sum che vel a awm chuan Bank a sum che vel a awm tihna a ni a, chu chuan economy thanna a thlen zel thei a ni,” a ti bawk.
Mizoram Cooperative Apex Bank hi kum 1982-ah cheng nuai 82 in bul tan niin tunah an sum che vel ‘transaction’ chuan vbc. 1151 vel a hawlh tawh a. Branch 20 neiin hnathawktu a nghet leh MR mi 200 bawr vel an awm a. MACB-ah hian Sawrkarin za zelah 23 bawr vel chan neiin a bak chu Shareholder leh Society ta chan a ni a. Thingtlanga a Primary Agricultural Credit Society 31 enkawl an nei mek bawk a ni.

Comments

Chhiar Hlawhte