Mizoram State Games neih tur atan inbuatsaih mek

Mizoram sawrkar in Mizoram State Games a buatsaih tur atana inbuatsaihna hi ngawrh taka kalpui mek zel a ni.

Thla thar December thlaa Mizoram pum huap infiamna pui, Mizoram State Games neih tur atan hian kawng hrang hrangah inbuatsaihna kalpui mek zel niin he State Games neih tura inkaihhruaina tur, ‘Mizoram State Games Technical Handbook’ chu nimin khan Sports Minister, Robert Romawia Royte chuan Aizawl a a Pisa-ah a tlangzarh a. Hemi hnu hian Sports Minister hian Mizoram State Games Office Chamber tur chu Directorate of Sports & Youth Services Office First Floor-ah a hawng nghal bawk a ni.

Mizoram State Games-ah hian inelna hrang hrang 32 buatsaih a ni ang a, chungte chu- Aquatics, Archery, Arm Wrestling, Athletics, Badminton, Basketball, Body Building, Boxing, Carrom, Chess, Cricket, Fencing, Football, Hockey, Indigenous Games, Judo, Karate, Kick Boxing, Motor Sports, Muaythai, Power Lifting, Sepaktakraw, Shooting, Snooker, Table Tennis, Tennis, Tug of War, Taekwondo, Volleyball, Weight Lifting, Wrestling leh Wushu a ni.

He State Games-ah hian Event tinah Constituency atangin Team leh Player pakhat zel chauh tel phal a ni a, kum bithliah awm lovin Player chu Voters ID a neihna Constituency chhung a mi ngei a ni tur a ni a. A finfiah nan Voters ID/Aadhaar Card/Birth Certificate ken ngei tur a ni thung a. Mizoram State Games 2019-ah hian Constituency tihthat dan inelna atan Medal Tally hman a ni ang. Overall Champion, Pahnihna leh Pathumna te Trophy pek an ni ang. He inelna hi Constituency wise-a neih tur a nih angin Constituency tinah bialtu MLA Chairman-na hnuaiah Committee din niin tunlai hian Constituency aiawha kal tur thlanna an nei mek a ni.