IGNOU Mizoram-a Regional Director hovin Serchhip-ah Induction Meeting neih a ni

Indira Gandhi National Open University (IGNOU) Study Centre-1914, Govt. Serchhip College chuan nimin khan Induction Meeting, 2019 neiin he hun hi IGNOU Mizoram-a Regional Director, Dr. SR. Zonunthara chuan khuallian niin a hmanpui a ni.

Govt. Serchhip College Room No. I-a he Induction Meeting-ah hian Dr. SR. Zonunthara chuan India ramah lehkha zir man, a bikin Higher Education ah a san thu leh hun leh tha, sum leh pai tam tak a tul thin avangin leh hna thawk chunga lehkha zir duhte tan Regular taka Class kal a harsat bawk si avangin sawrkar laipui chuan Parliament-ah Dan siamin kum 1985-ah IGNOU hi kalpui tan a nih thu a sawi a. Rampum a State hrang hrangah Regional Center siamin Mizoram-ah pawh Regional Center pakhat siamin hemi hnuaiah hian Study Center 43 awmin Govt. Serchhip College chu Study Center pakhat a nih thu a sawi a. Heng Study Center-ah hian Coordinator pakhat zel awmin, Regular Institution te chu Inrinni leh Pathianni-ah khar a nih avangin heng te hi hmang tangkaiin, IGNOU chu Inrinni leh Pathianni ah hawn a nih thin thu a sawi.
IGNOU hnuaiah hian ST/SC tan Bachelor Degree thleng leh Certificate Course bakah PG Diploma zir man a thlawn vek a nih thu pawh sawiin IGNOU Mizoram Regional Director chuan, Master Degree-ah erawh chuan ngaihhnathiamna a awm tawhloh thu a sawi bawk a. Hei bakah hian Mizoram-ah Open Education kalpuitu hmasa thenkhat ten Exam an kalpui thin dan ah a bu en chunga an Exam tir mai thin avang leh zirlai ten Fee an chawi tur ang an chawi vek hnuah a enkawltute zingah rinawmlo te an awm avangin Open Education ngaihhniamna a awm thin tih pawh sawiin, hei hi IGNOU kaltlanga siamthat hna an thawh thu leh tunah chuan a ziaawm tawh thu sawiin, Open Education kan en dan pawh a danglam tawh thu a sawi a, tuna IGNOU in exam an kalpui dan te pawh a sawi bawk. Hei bakah hian IGNOU hmalakna dang te pawh tarlangin Mizoram-ah Adopted Village 5 an neih mek thu leh sawrkar laipui ruahmanna anga thingphun kawnga hma an lakna te pawh a sawi bawk.
Govt. Serchhip College IGNOU Study Center-a Coordinator, K. Laldinpuii kaihhruai he hunah hian Govt. Serchhip College Principal, PC. Lalremsiama pawhin thu sawiin IGNOU chu India rama Distance Education-ah a rintlak ber a nih thu leh hetianga zir thei an ni chu zirlaite an vanneih hle tih a sawi a, IGNOU chuan kan kawngka bulah zirna sang min chhawp sak tih sawiin, zirna pangngai ah Exam turin zaa 75 tal Class kal a tul avanga regular Class kal hmanlo tan IG-NOU pawimawhna a sawi a. IGNOU hnuaia zirna standard chu a hniam loh thu sawiin, hna zawnna ah pawh IGNOU a zir te chu rampum ah hriat an nih thu leh India Parliament in Dan siama a din anih avangin a rintlak bakah leh India ramchhung mai bakah rampawn thlenga an inzarpharh thu a sawi a, harsatna engemaw neih avanga lehkha zir zui theilo te pawh hrilh chhawng zel turin he huna tel te chu a chah bawk.
Nimin a he hun hmanna ah hian IGNOU Study Center, Serchhip-a zirlai thahnem tak telin, hriat tur pawimawh hrang hrang inhrilhfiah a nih bakah zawhna leh chhanna hun hman a ni bawk. Kumin hian Govt. Serchhip College IGNOU Study Centre 1914 ah hian zirlai lut thar mi 389 an awm a ni.
IGNOU hnuaiah hian Programme Offer 241 awmin zirlai inziaklut 30,93,583 an awm a, Regional Centre 67 awmin rampawn ah Study Center 12 a awm bawk a. Mizoram Regional Center hnuaiah Study Center 43 awmin Prog-ramme Offer 64 a awm a, zirlai 20,000 vel awmin kumin hian zirlai thar 5062 an awm a. Session thar atan Admission hawn leh mek a ni bawk a, Admission ti duh tan Govt. Serchhip College-ah hian ngaihven theih a ni bawk.

Comments

Chhiar Hlawhte