Mizoram Open Chess Championship zofelin David Laldintluanga, New Serchhip Venglai a champion

Tunkar Thawhlehni a\anga New Serchhip YMA Hall-a neih 21st Mizoram Open Chess Championship chu nimin khan zofelin nimin tlai dar 3:00 khan a kharna neih a ni a, Chess khel thuam mi 50 chuang tel zingah a pumpui-ah David Laldintluanga New Serchhip Venglai chu pakhatna a ni.

Mizoram Chess Association (MCA) leh Serchhip District Chess Association (SDCA) buatsaih, 21st Mizoram Open Chess Championship kharna hun hi Serchhip District Chess Association President, Vanlalzarliana chuan kaihruaiin Serchhip DRDA Project Director, H. Dolianbuaia chuan khuallian niin a hmanpui a. He hunah hian khuallian chuan Chess chu game puitling, Gentlemen game a ni tih sawiin, he Championship a tel zawng zawngte leh lawmman latute pawh Mizoram chhung mai nilo, India ram leh Khawvel pum huap pawh a invawrhsang zel tura hmasawn zel turin duhsakna a hlan bawk.
Nimin tlai-a 21st Mizoram Open Chess Championship kharna hunah hian Dr. Lalhmuchhuaka, President Mizoram Chess Association chuan thu sawi bawkin, he Championship khel tura tel zawng zawngte chuangah lawmthu sawiin, Mizoram pum huap Chess inelna ah mimal ngai reng champion \hin tawh lova mi hrang hrang in pakhatna lawmman an in lak chhawk \hin ta chuan player te nasa takin hma an sawn tih a lantir tih a sawi a, Mizoram Chess Association chuan District leh Club, leh players te hmasawnna atan hmalakna a kalpui reng a ni, a ti bawk.
New Serchip YMA Hall-a khelh 21st Mizoram Chess Open Championship-ah hian Chess khel thiam mi 52 telin heng zingah hian mi 44 te chu MCA Rated player an ni a, he Championship-ah hian Serchhip khawchhung a\angin mi 15 telin a bak mi 37 te hi khaw dang a\anga tel an ni thung.
He Championship-ah hian a khingpui te zawng zawng hnehtu, David Laldintluanga, New Serchhip Venglai chuan lawmman pakhatna a lain Trophy leh Certificate bakah pawisafai Rs. 20,000/- a dawng a, ani hian piont 7.5 a hmu a. Point 6.5 hmutu Anthony F. Lal\hasanga, New Siaha chuan lawmman pahnihna dawngin point 6 hmutu, Robert Runremmawia, Lunglei chu pathumna a ni bawk.

Comments

Chhiar Hlawhte