Mizoram Larsap atan PS. Sreedharan Pillai lalut ta

Mizoram hmasawnna atan theihtawp chhuah ka tum - Larsap

Mizoram Larsap 21-a ni turin nimin khan PS. Sreedharan Pillai chu Gauhati High Court Chief Justice, Justice Ajai Lamba chuan rinawmna thu tiam tirin a lalut a. Larsap thar chuan BJP a nihna chu a bansan tawh thu sawiin, Mizoram hmasawnna atan theihtawp chhuah a tum thu a sawi.

Raj Bhavan Circular Lawn-a Mizoram Larsap thar lakluhna puala inkhawm nimin a neih ah hian Oath of Office neih a nih hmain Mizoram Chief Secretary, Lalnunmawia Chuaungo chuan India President, Ram Nath Govind-a kutziak leh seal chuang, Warrant of Appointment chu a chhiarchhuak hmasa a, hemi hnu hian Larsap thar hi rinawmna thu tiam tirin Mizoram Larsap thar atan lakluh a ni zui a ni. Vawiin a Larsap lakluhna inkhawm ah hian Chief Minister Zoramthanga, Speaker Lalrinliana Sailo, Minister leh Minister of State te bakah MLA te an kal kim hle a. Official pawimawh Head of Office, Head of Department leh sawm bik mi pawimawhte te pawh an tel a. Governor chhungte bakah Governor then leh rual te he hun hmang tura Mizoram rawn thleng te pawh an thahnem hle a ni.
Mizoram Larsap thar, PS. Sreedharan Pillai hi December 1, 1953 khan Venmony khua, Alappuzha District, Kerala State-ah a piang a. A nu leh pa te chu VG. Sukumaran Nair leh Bhavani Amma te an ni a. A nupui Reetha Sreedhar nen fapa pakhat leh fanu pakhat an nei a ni. Zirna lamah B.A., LLB Degree nei a ni a. Amah hi Dan hre mi, eizawnna lamah Ukil hlawhtling tak niin Kerela High Court-ah Ukil hna a thawk thin a, a nupui leh a fapa bakah an makpa pawh hi Ukil hnathawka eizawng an ni. Mipui rawngbawlna huanga mi inhmang mi tak niin Politics-ah a zuanglut a. Governor a ruat a nih hma thleng khan Bharatiya Janata Party(BJP) tana mi tangkai tak niin kum 2003 atanga 2006 thleng khan Kerela State BJP President nihna te pawh a lo chelh tawh a. Politics leh a eizawnna huang pawnlamah pawh vantlang tana mi inhmang tak a nih bakah thuziak mi niin lehkhabu tha tak tak a lo ziak tawh bawk a ni.
Larsap atana lakluh a nih hnua thuthar thehdarhtute a kawmnaah zawhna chhangin Larsap thar, PS. Sreedharan Pillai chuan BJP a nihna chu a bansan tawh thu sawiin, “Governor ni tura ruatna ka pawm hnuah BJP ka nihna atangin ka bang tawh. Insiam rem a har lo ang, Kerela BJP hruaitu ka nih lai pawhin Kerela Pradesh Congress Committee-in ka article min published sak,” a ti.
Governor thar chuan India Danpui-in ti tura a tihte tha taka a hlenchhuah a tum thu sawiin, “Mizoram hmasawnna atan theihtawp chhuah ka tum,” a ti a, mipuite'n harsatna leh mamawh an neihte zirchian a tum thu a sawi bawk.
Mizoram hi kum 1972 atangin Lieutenant Governors hran neiin a awm a, kum 1987-a State dinhmun a luah hma zawngin Lieutenant Governors 6 a nei hman a. Kum 1987-a Mizoram in State dinhmun a luah hnuah P.S. Sreedharan Pillai hi Governor nghet 15-na niin hemi karah hian Mizoram Governor hna chelh lailawktu mi 5 an awm tawh bawk a, tuna Larsap thar nen hian Mizoram chuan State a nih hnuah Governor 21 a nei ta a ni.

Comments

Chhiar Hlawhte